VIKEKE, 28 Maiu 2025 (TATOLI)—Autoridade suku Bahalara Uain, postu administrativu Vikeke Vila, munisípiu Vikeke, husu Governu konstrui irrigasaun Uelaku Been atu fasilita agrikultór sira halo natar hodi hasa’e produsaun hare.
“Irrigasaun Uelaku been uluk di’ak, maibé mota tun estraga tiha. Nune’e, iha tempu halo natar ita-nia agrikultór sira mak taka rasik, depois kanaliza bee ba natar hodi halai natar. Tan ne’e, ha’u hakarak husu ba Governu se bele konstrui irrigasaun Uelaku Been ba permanente, atu la bele difikulta ba ita-nia agrikultór sira-nia atividade halai natar,” Xefe suku Bahalara Uain, Angelo N. dos S.D.L. Pinto, hateten ba jornalista sira, iha suku Bahalara Uain, ohin.
Angelo profunda, foin lalais mota sobu tiha irrigasaun nune’e autoridade hamutuk agriultór Bahalara Uain husu apoiu ba servisu Agrikultura munisípiu Vikeke mobiliza eskavatór hodi halo normalizasaun ba irrigasaun hafoin distribui bee ba natar.
“Irrigasaun ne’e bee sempre estraga. Kuandu estraga ona ami esforsu husu ajuda servisu agrikultura apoia eskavatór hodi normaliza. Tanba ne’e, ba oin, presiza kria infraestrutura normaliza estrada ba irrigasaun Uelaku Been hodi la bele difikulta ba agrikultór sira,” nia dehan.
Nia hateten, irrigasaun di’ak mak agrikultór sira sei hasa’e produsaun hare tanba área sira-ne’e poténsia tebe-tebes ba hare, maibé kondisaun irrigasaun mak sai difikuldade ba agrikultór sira iha suku Bahalara Uain.
“Ha’u sente ita-nia irrigasaun ne’e kuandu di’ak, ha’u fiar ita sei hasa’e produsaun hare. Ohin loron irrigasaun ladun di’ak, entaun labele fornese bee ba natar sira,” nia hateten.
Tuir dadus, natar iha área Uelaku Been, suku Bahalara Uain sei funisiona ne’e hamutuk ektare 200 no natar hamutuk ektare 300 agora sai abandonadu.
Iha fatin hanesan, komunidade Ai-Sa’e, suku Bahalaran Uain, Abilio Pinto, profunda suku Bahalara Uain poténsia ba setór agrikultura, maibé irrigasaun mak sai difikulta ba agrikultór sira.
“Ami-nia natar foin lalais halo tarde tiha tanba irrigasuan aat. Tan ne’e, ami hakarak husu ba Ministériu Agrikultura hodi konstrui irrigasaun atu ami bele halo natar ho di’ak,” nia dehan.
Hatán ba preokupasaun ne’e, diretór servisu Agrikultura munisípiu Vikeke, Olivio Soares Freitas, haktuir kona-ba irrigasau Uelaku Bein servisu agrikultura munisípiu Vikeke tau ona ba planu insfraestrutura 2026 nian.
“Irrigasaun Uelaku Bein nian ne’e ha’u tau ona ba planu tinan 2026-2027. Nune’e mós ha’u orienta ona extensionista sira rekolla dadus natar nian. Se ita konsege konstrui irrigasaun, ita mós husu komunidade tenke halo natar hodi hasa’e produsaun hare hanesan xefe suku Bahalara Uain informa ne’e,” nia hateten.
Nia dehan, daudaun ne’e, MAPPF kontinua destaka ekipamentu eskavadór iha Vikeke Vila, karik mota sobu irrigasaun halo kedas normalizasaun atu nune’e labele difikulta ba dostribuisaun bee ba natar.
Jornalista : Vitorino Lopes da Costa
Editór : Cancio Ximenes
