BAUKAU, 28 Maiu 2025 (TATOLI)–Membru Polísia Nasionál Timor-Leste (PNTL) husi Batallaun Orden Públiku (BOP) iha Kompañia Bravo hamutuk na’in-48, kuarta ne’e, promovidu diviza iha Munisípiu Baukau.
Komandante Jerál PNTL ein-Substitusaun Komisáriu Polísia Pedro Belo, lori naran instituisaun hato’o parabéns ba membru BOP Kompañia Bravo ne’ebé promovidu tanba sai ponte motivadór, inspiradór no hametin étika serbisu inklui enkoraja membru hotu hodi hadi’a dezempeñu serbisu inklui dedikasaun hodi serbí Estadu no povu Timor-Leste.
“Unidade Espesiál Polísia hanesan pilár inportante iha PNTL ne’ebé iha kapasidade mantein no estabelese fali orden públiku, rezolve no krítiku hodi halo intervensaun tátika bainhira iha situasaun perigu,” Belo hateten iha edifísiu Komandu PNTL Munisípiu Baukau, Vila Nova.
Pedro Belo informa katak UEP iha kna’ar no responsabilidade ne’ebé importante inklui risku hanesan asegura seguransa interna liuliu ligadu ho situasaun perigu, ameasa, kompleksu hodi asegura fatin vitál sira no fó seguransa ba alta integridade nasionál no internasionál sira.
Komisáriu Belo argumenta, promosaun transzitóriu diviza ne’e la’ós prémiu maibé rekoñesimentu husi Estadu, Governu no instituisaun relasiona ho membru hotu nia dedikasaun, prestasaun serbisu, integridade no devosaun durante tinan naruk ba povu, nasaun no Estadu.
“Presiza tebes formasaun no treinamentu atu hasa’e kualidade hodi prontidaun hala’o kna’ar hasoru krime ne’ebé iha intensidade aas,” Komisáriu Pedro Belo esklarese.
Desizaun promove diviza membru PNTL bazeia ba rejime transzitóriu no tuir antiguidade ne’ebé define iha Estatutu PNTL, aprova husi Dekretu-lei númeru: 35/2024, loron 18 Outubru.
Aleinde ne’e, bazeia ba despaxu Governu liuhusi Ministériu Interiór (MI) ho numéru: 14/G-MI/III/2025 kona-ba promosaun transzitória PNTL no despaxu Komandu PNTL numéru: 239/CG-PNTL/ IV/2025 kona-ba promosaun postu ajente prinsipál no ajente prinsipál ba ajente xefe.
Totál membru BOP na’in-48 BOP ne’ebé promovidu kompostu husi postu superintendente asistente na’in-rua, inspetór xefe na’in-ida, asistente inspetór hamutuk na’in-19, sarjentu xefe na’in-sia no ajente xefe na’in-13.
Entretantu, inspetór ba serimónia impozisaun diviza prezide husi Komandante Jerál PNTL ein-Substitusaun Komisáriu Polísia Pedro Belo, akompañadu husi Komandante Unidade Espesiál Polísia (UEP), Superintendente Xefe Damião Correia no partisipa husi Prezidente Autoridade Munisipál Baukau, Veneranda Lemos Martins no autoridade lokál inklui família sira.
Jornalista: Natalino Belo
Editór: Xisto Freitas da Piedade
