DILI, 28 Maiu 2025 (TATOLI)– Ministra Negósiu Estranjeiru Singapura, Vivian Balakrishnan, haktuir fila-fali ninia nasaun nia apoiu maka’as ba Timor-Leste nia prosesu adezaun tomak iha ASEAN.
Iha komunikadu ofisiál ne’ebé publika iha ninia pájina ofisiál, Vivian hateten katak Líder ASEAN sira deside ona hodi admiti Timor-Leste nu’udar membru ASEAN ba dala 11 iha Simeira ba dala 47 ne’ebé sei hala’o antes tinan ne’e remata.
Desizaun ida-ne’e tuir akordu iha prinsípiu ne’ebé hetan iha tinan 2022, no mós Roteiru 2023 ne’ebé dezenvolve ona ho Timor-Leste hodi prepara ba nia adezaun tomak ba ASEAN.
“Singapura iha istória ne’ebé naruk hodi fó apoiu ba Timor-Leste,” Vivian hateten iha nia pájina ofisíal.
Notisia relevante : Timor-Leste tenke servisu makaas atu sai membru plenu ASEAN
Nia destaka kontribuisaun sira Singapura nian dezde inísiu independénsia Timor-Leste nian, inklui liuhosi misaun pás ONU nian, investimentu sira, no apoiu iha edukasaun no planeamentu urbanu.
Hanesan parte ida hosi ninia kompromisu ne’ebé la’o daudaun, Singapura mós loke Embaixada ida iha Dili iha Abril 2024, hanesan marka signifikativu ida iha relasaun bilaterál sira entre nasaun rua ne’e.
Aleinde ne’e, Singapura iha kompromisu atu apoia Timor-Leste nia implementasaun ba Roteiru 2023 liuhosi inisiativa oioin, inklui programa Apoiu ba Prontidaun ASEAN (STARS) Singapura–Timor-Leste no Inisiativa Integrasaun ASEAN (IAI).
“Bainhira Timor-Leste prepara adezaun plena iha Outubru no konklui negosiasaun kona-ba akordu ekonómiku xave sira ASEAN nian, Singapura sei kontinua hasa’e nia apoiu tékniku no diplomátiku,” Vivian esplika.
Nia hatutan, apoiu ida-ne’e ho objetivu atu Timor-Leste bele fó ninia kontribuisaun tomak ba integrasaun rejionál no harii komunidade ASEAN nian.
Antes ne’e, iha Simeira ASEAN ba dala 46 iha Kuala Lumpur, Primeiru Ministru Malázia, YAB Dato’ Seri Anwar Ibrahim, ofisialmente deklara katak Timor-Leste sei sai membru plenu ASEAN nian iha Simeira ba dala 47 ne’ebé tuir planu sei hala’o iha Outubru 2025, iha Kuala Lumpur.
Jornalista : Cidalia Fátima
Editora : Armandina Moniz
