DILI, 28 Maiu 2025 (TATOLI)—Departamentu Justisa (DoJ) Filipina iha Kuarta ne’e fó sai katak Governu Filipina nota dezenvolvimentu sira foin lalais ne’e iha Timor-Leste kona-ba antigu kongresista Negros Orientál, Arnolfo Teves Jr.
DoJ Filipina hein asaun governu Timor-Leste nian kona-ba kazu Teves nian.
“Ami repete katak Filipina preparadu ona atu lori Señor Teves ba uma hodi hasoru akuzasaun sira hasoru nia dezde tempu ne’ebé ami-nia pedidu ba nia estradisaun hetan aseitasaun ba dala uluk. Maibé, desizaun ne’e hetan inversaun ne’ebé la espera, hodi para prosesu ne’e,” sita husi Philippine News Agency.
Notísia relevante : Autoridade seguransa kaptura ona Arnolfo Teves no ohin sei deporta ba nia rai orijen
Aleinde ne’e, DoJ Filipina apresia ho desizaun Governu no Estadu Timor-Leste kona-ba desizaun ba fujitivu Arnolfo Teves Jr.
“Ami simu ho laran haksolok pronunsiamentu sira foin lalais ne’e husi Timor-Leste ne’ebé indika pozisaun renovadu ida katak Señor Teves labele hela nafatin iha sira-nia territóriu, ami hein sira-nia asaun—karik nia sei deporta de’it tanba nia ema estranjeiru indokumentadu ka estradita kedas tuir ami-nia aplikasaun ne’ebé pendente. Ami subliña katak Governu Filipina seidauk hetan dokumentu legál ka ofisiál ruma kona-ba asuntu ne’e,” DoJ Filipina, deklara.
TATOLI
