DILI, 29 Maiu 2025 (TATOLI)–Fujitivu Arnolfo Teves Jr, iha kinta loraik tuku 14:30 Otl ne’e, deportadu hikas ona bá ninia rai orijen, Filipina, ho aviaun marka Philippine Air Force 142.
“Obrigadu ba Timor no obrigadu…,” liafuan ne’e mak Arnolfo tatoli hela molok sa’e aviaun funu ne’e.
Philippine Air Force to’o iha Aeroportu Internasionál Prezidente Nicolau Lobato, Komoro, Dili, tuku 13:20 Otl.
Prosesu deportasaun ne’ebé hala’o husi autoridade Timor-Leste liuhusi Ministru Justisa, Sergio Hornai, iha aeroportu ne’e, simu direta husi International Police (Interpol) Filipina nian no akompañadu husi Embaixadór Filipina iha Timor-Leste.
Molok entrega ba autoridade Filipina, Embaixadór Filipina hamutuk ho reprezentante Departamentu Ministériu Justisa Filipina ho autoridade Timor nian asina nota entrega hodi entrega Arnolfo ba nia nasaun.
Iha ámbitu ne’e, autoridade seguransa la autoriza Arnolfo Teves nia oan tama bá aeroportu ho intensaun atu kumprimenta dala-ikus nian ba ninia aman.
Jornalista: Natalino Costa
Editór: Xisto Freitas da Piedade
