Autoridade Vikeke prefere SEFOPE loke formasaun iha postu administrativu
VIKEKE, 29 Maiu 2025 (TATOLI)—Sekretáriu Munisípiu Vikeke Asuntu Organizasaun no Komunitária, Acacio de Sousa, prefere ba Sekretáriu Estadu Formasaun Profisionál Empregu (SEFOPE) loke formasaun liuliu ba lian inglés kada postu administrativu hodi fasilita joven sira aprende.
“Governu Kontituisionál da-sia (IX) hanoin di’ak lori formasaun hakbesik ba munisípiu ona, maibé ha’u-nia pedidu hakarak hato’o ba SEFOPE ba oin bele loke mós formsaun lian inglés ba postu administrativu sira, atu nune’e ita-nia joven sira aproveita aprende lian inglés. Tanba, agora daudaun formasaun lian inglés iha postu Vikeke Vila, entaun ita-nia joven sira husi postu haat labele partisipa másimu iha formasaun,” Acacio de Sousa hateten ba jornalista sira iha postu Vikeke, ohin.
Joven sira iha hakarak partisipa formasaun sira-ne’e, maibé kondisaun estrada husi Uatukarbau, Uatulari no Lakluta liga munisípiu Vikeke aat, entaun difikulta ba joven sira labele partisipa formasaun sira-ne’e.
“Ita-nia estrada husi postu mai munisípiu Vikeke kondisaun aat, ne’ebé ita-nia joven sira labele asesu formasaun lian inglés agora loke iha Vikeke. Ha’u espera SEFOPE bele tau ajenda hodi lori formasaun sira-ne’e ba to’o postu hodi ita-nia joven sira aprende,” nia hateten.
Diretór Jerál Koorporativu husi SEFOPE, Nelson Soares Carvalho, haktuir iha munisípiu Vikeke SEFOPE seidauk iha fatin propriu ba formasaun lian englés ba joven sira hodi asesu ba formasaun.
“Ami hatene katak iha munisípiu Vikeke seidauk iha sentru formasaun foku ba lian inglés. Ita iha sentru formasaun ida iha Beaço, maibé fatin la sufisiente hodi akumula joven sira aprende lian inglés. Nune’e, formasaun ba lian ingklés ne’ebé agora daudaun la’o iha Vikeke, uza de’it sala eskolár Ensinu Báziku Sentral (EBC, sigla portugés) 01 Baimeta nian. Iha polítika SEFOPE ba tinan lima nian sei tau sentru formasaun ba lian inglés iha munisípiu sira, nune’e munisípiu Vikeke sei implementa iha tinan 2026. Maibé problema mak rai ne’ebé ita sei kria polítika hodi prepara fatin ba joven sira iha Vikeke,” nia dehan.
Jornalista : Vitorino Lopes da Costa
Editór : Cancio Ximenes
