CCLN simu ekipamentu saúde husi Veteranu Nova Zelándia

DILI, 29 Maiu 2025 (TATOLI)—Konsellu Kombatente Libertasaun Nasionál (CCLN-sigla portugeza) Munisípiu Baukau, simu ekipamentu saúde husi doadór (veteranu) Nova Zelándia hodi kompleta no koloka iha Sentru Tratamentu Saúde Veteranu David Alex Daitula, iha Baukau.

Ekipamentu sira-ne’e kompostu hosi kama ospitál nian, kolxaun kama ospitál nian, protetór ba asuntu ospitál nian, lensu ospitál nian, hena ospitál nian oinoin, manta, saku fase roupa nian, kaixa sasán oinoin ospitál nian, hena sirúrjiku nian no ekipamentu sirúrjiku sira.

Prezidente Konsellu Veteranu Munisípiu Baucau, Fernando Berdu Gusmão, hateten ekipamentu ne’e sei ajuda Sentru Daitula atu atende populasaun.

“Doadór sira husi Nova Zelándia ne’e veteranu, tanba ne’e ami husu sira atu ajuda ami ho ekipamentu ne’e liuhusi ami nia eis-embaixadór hodi fó ekipamentus ne’e ba ami. Apoiu ekipamentu ne’e ba daruak ona,” Fernando Berdu Gusmão ba jornalista sira iha Manleuana, Dili, kinta ne’e.

Nia hatutan, ekipamentu ne’e fahe mós ba sentru saúde sira iha munisípiu sira hanesan Ainaru, Bobonaru, Baukau, Kovalima, Lautein no Vikeke hodi atende veteranu sira no populasaun.

Iha fatin hanesan, Vise-Ministruba Asuntu Operasaun Ospitál, Flávio Brandão, hateten ekipamentu ne’e fornese hosi veteranu Nova Zelándia nian.

“Ha’u husu Sentru Daitula Baukau atu haforsa servisu atendimentu paliativu sira. Ami agradese ba Nova Zelandia nia apoiu ida-ne’e,”  Flávio tenik.

Aleinde ne’e, asesór médiku iha Sentru Daitula, Philip Mwenja Mwaura, informa Sentru Daitula ne’e fó kuidadu ba veteranu sira no sira-nia família no populasaun.

“Veteranu sira-ne’e idozu no hasoru problema kardiovaskulár, ipertensaun, diabetes no sira seluk, tanba ne’e sira presiza kuidadu paliativu,” Philip Mwenja Mwaura konklui.

Jornalista: Felicidade Ximenes

Editór: Xisto Freitas da Piedade