DILI, 29 Abríl 2025 (TATOLI) – Departamentu Justisa Filipina nian(DOJ) garante ba komunidade internasionál no públiku katak, sei halo prosesu hasoru Arnolfo Teves ho loloos no sei halo obervasaun ho rigorozu.
Tuir nota imprensa ne’ebé Ajénsia Tatoli liuhsi Filpine News Agency, kinta ne’e katak Departamentu Justisa, Filipina nian mobiliza ona ekipa konjunta ida ne’ebé kompostu husi reprezentante sira hosi ajénsia, Gabinete Imigrasaun, no Gabinete Nasionál Investigasaun nian hodi koordena besik ho autoridade timoroan sira no tulun iha repatriasaun seguru, no legál hosi kongresu formál sira hosi Kongresu Orientál Teves Jr. fila-fali ba Filipina.
Departamentu Justisa Filipina fó-sai ne’e hafoin Governu Timor-Leste konfirma iha loron-kuarta, 28 Maiu deside deporta no bandu Teves tama iha Estadu sudeste aziátiku durante tinan 10, hodi nota katak nia prezensa hanesan ameasa ida ba seguransa nasionál no ba orden públika.
“Enkuantu ita hein Sr.Teves nia to’o, Governu Filipina garante ba públiku no komunidade internasionál katak prosesu loloos sei observa ho rigorozu no katak justisa sei hala’o lahó ta’uk ka favor,” refere nota imprensa ne’e.
Autoridade Seguransa kompostu husi Servisu Migrasaun (SM) no Batallaun Orden Públiku (BOP), tersa kalan maizumenus tuku 20:20 Otl, kaptura sidadaun Filipina, Arnolfo Teves JR, iha nia rezidénsia, Metiaut, Dili.
Tuir informasaun ne’ebé TATOLI asesu husi pesoál informadór sekretu katak motivu autoridade seguransa bá foti obrigatoriamente Arnolfo tanba ezekuta desizaun Tribunál nian ne’ebé indefere ona pedidu azilu polítiku ne’ebé antes ne’e nia hato’o ba Tribunál basaa nia sente persegidu polítiku iha nia rai orijen.
Tuir Tribunál katak pedidu azilu polítiku ne’e só atribui ba ema iha nia nasaun orijen ne’ebé sente persegidu hanesan situasaun polítika ladi’ak no defende direitu umanu. Enkuantu, sidadaun Arnolfo molok ne’e akuzadu ba krime asasinatu iha nia rai orijen, Filipina. Ho razaun ne’e mak sidadaun ne’e la prenxe kritériu ba azilu polítiku.
Oras ne’e, sidadaun referida asegurada ona iha edifísiu Servisu Migrasaun Vila Verde no tuir planu sei deporta hikas bá nia rai orijen, iha kuarta (28/05) tuku 03.00 ne’e.
Ba asuntu ne’e, Defeza husi Arnolfo Teves Jr, Advogadu Privadu José Ximenes, hateten nia la konkorda ho maneira atuasaun autoridade seguransa ba nia kliente.
Hanesan informa nanis ona, katak iha loron 20 fulan-Marsu 2025, Supremu Tribunál Justisa (STJ) Timor-Leste nian deside indefere pedidu estradisaun ne’ebé hato’o husi Governu Filipina ho nune’e Arnolfo Teves Jr sei la hetan estradisaun.
Fujitivu red notice hosi INTERPOL ho naran kompletu Arnolfo “Arnie” Alipit Teves Jr ka Arnolfo Teves Jr, tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia feen no oan-feto.
Bainhira Arnolfo Teves Jr ne’ebé sai hanesan autór bá kazu omisídiu oioin iha provínsia Negru Oriental, Filipina, to’o iha Aeroportu Internasionál Prezidente Nicolau Lobato, Díli, tempu ne’ebá, deskonfia simu direta hosi asesór prinsipál balun Prezidente Repúblika nian tempu ne’ebá.
Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór Negru Oriental, Roel de Gamo hetan kapturasaun no detensaun hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.
Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.
Eis lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés) iha fulan-Fevereiru 2023. Notifikasaun red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.
Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.
TATOLI
