KOVALIMA, 29 Maiu 2025 (TATOLI) – Servisu Munisipál Apoiu Organizasaun Naun-Governamentál no Organizasaun Komunitária (SMAOGOK), semana-oin, sei halo monitorizasaun ba servisu ofisiál suku sira, iha suku lima iha Postu administrativu Suai Munisípiu Kovalima.
“Ami presiza halo monitorizasaun servisu husi ofisiál suku sira tanba durante ne’e sira ladun intende oinsá atu prienxe dadus monografia, demografia, mortalidade ne’ebé nia formuláriu la hanesan, tanba durante ne’e ami hasoru difikuldade atu relata dadus”, Diretora SMAOGOK, Maria de Jesus Perreira, hato’o ba TATOLI, iha nia servisu fatin, ohin.
Dirijente ne’e rekoñese, durante ne’e seidauk halo monitorizasaun servisu ba ofisiál suku, maibé semana oin iha loron 02 juñu hahú hala’o ona monitorizasaun ba servisu ba ofisiál suku iha suku lima postu Suai nian.
Durante ne’e hasoru difikuldade, husi aldeia rekolla dadus hodi entrega ba iha suku hafoin halo rekapitulasaun no kontinua submete ba iha postu administrativu hodi halo aprovasaun lori mai iha munisípiu maibé durante ne’e submete tarde.
“Dala ruma sira submete dadus 2024 ni’an, entaun dadus la iha mudansa , tanba ne’e mak ami hakarak halo monitorizasaun ba iha suku sira nune’e bele rekolla dadus ne’ebé mak reál iha suku lima husi postu Suai”, nia informa.
Tuir oráriu, funsionáriu SMAOGOK hala’o monitorizasaun ba servisu ofisiál suku, hahú iha Postu Suai iha nia Suku hanesan Suai Loro, Debos, Kamnasa, Labarai no Suku Beko, tanba haree ba iklima daudaun ne’e udan hela.
Kona-ba atu halo monitorizasaun iha postu administrativu sira seluk, nia parte sei haree kondisaun klima, maibé iha posibilidade ba iha trimestre datoluk bele halo ona monitorizasaun ba servisu ofisiál suku sira iha postu sira seluk.
Munisípiu Kovalima iha nia Postu administrativu hitu mak hanesan Postu administrativu Fatululik, Fatumea, Fohorem, Tilomar, Suai no Zumalai iha nia suku 30 no aldeia 148.
Ministériu Administrasaun Estatál (MAE) hala’o prosesu rekrutamentu ba pesoál servisu administrativu apoiu suku iha Timor-Leste bazeia ba Dekretu-Lei númeru 81/2023, de 11 Outubru. Dekretu-lei ida ne’e kria pozisaun haat iha suku sira, hanesan:
- Sekretáriu Administrasaun Suku
- Ofisiál Finansa Suku
- Ofisiál Administrasaun Suku
- Ofisiál Asuntu Sosiál Suku
Prosesu rekrutamentu ne’e fó prioridade ba ema ne’ebé mai husi suku nia oan rasik, hodi reforsa administrasaun no dezenvolvimentu lokál, no prepara ba dezentralizasaun poder lokál. Kandidatu sira tenke submete dokumentu iha postu administrativu tuir área jeográfika, no ekipa júri lokál sei halo selesaun.
Kondisaun kontratu mak modalidade termu-sertu, durasaun fulan-ualu (períodu provatóriu fulan-rua), ho saláriu mensál $150, no posivel estensaun kontratu bainhira avaliasaun pozitiva. Inisiativa ida-ne’e importante atu reforsa kapasidade suku sira, aumenta efisiénsia administrativu, no kontribui ba dezenvolvimentu komunidade.
Jornalista:Celestina Teles
Editór: Rafael Ximenes de A. Belo
