Embaixadór Brunei Wan Lutfan despede Primeiru-Ministru
DILI, 30 Maiu 2025 – Embaixadór Brunei Darussalam iha Timor-Leste (TL), Wan Hadfi Lutfan, despede ohin ho Primeiru-Ministru (PM), Xanana Gusmão, iha Palásiu Governu, Dili.
Iha despedida ne’e embaixadór rekoñese katak durante mandatu, liuliu iha tinan tolu ikus ne’e konsege dezenvolve kooperasaun ho Timor-Leste iha setór saúde, edukasaun, konetividade aérea no indústria petróleu no gás.
Kooperasaun sira ne’ebé metin tebes no oras-ne’e la’o hela konta mós ho vizita nivel aas husi Majestade Sultan Brunei Darussalam, Hassanal Bolkiah Muiz’zaddin Wad’daulah, mai Timor-Leste iha 2024.
Iha okaziaun ne’e mós diplomata ne’e kongratula Timor-Leste ne’ebé sei sai hanesan membru plenu ba ASEAN iha tinan ne’e nia rohan.
“Ha’u hakarak kongratula Timor-Leste ne’ebé sei hola parte hanesan família ASEAN nian iha fulan-Outubru tinan ne’e bazeia ba desizaun líder sira iha Simeira ASEAN bá da-46 iha Kuala Lumpur. Susesu ba Timor-Leste”, Wan Hadfi Lutfan hato’o bainhira despede Xanana Gusmão.
Iha biban ne’e Primeiru-Ministru mós agradese bá dedikasaun husi embaixadór Lutfan hodi hametin relasaun Timor-Leste no Brunei Darussalam no dezeja susesu iha futuru.
Embaixadór Lutfan hahú hala’o knaar iha Timor-Leste iha fulan-Juñu 2022 no filafali bá Brunei Darussalam atu hala’o fali misaun seluk.
Jornalista: Arminda Fonseca
Editora: Maria Auxiliadora
