Emprezáriu Tailándia manifesta interese apoia Timor-Leste nia dezenvolvimentu iha setór oioin
DILI, 30 Maiu 2025 (TATOLI) – Delegasaun altu nivel reprezentante emprezáriu sira husi nasaun Tailándia hasoru malu ho Primeiru-Ministru, Xanana Gusmão, iha Palásiu Governu, hodi esplora oportunidade investimentu iha Timor-Leste.
Iha sorumutu ne’e, Primeiru-Ministru ho laran haksolok hato’o benvindu ba delegasaun ne’e no hato’o nia otimizmu kona-ba futuru parseria nian.
“Ha’u foin simu delegasaun emprezáriu sira husi Tailándia, sira mai haree oportunidade no oinsá sira bele investe hodi ajuda dezenvolve ita-nia rai. Ne’e hanesan troka ideia ne’ebé di’ak tebes”, Xanana hateten ba jornalista sira hafoin enkontru.
Xefe Governu subliña vizita emprezáriu Tailándia ne’e iha ona persepsaun di’ak kona-ba realidade Timor-Leste, nune’e sira sei mai beibeik haree oinsá atu halo investimentu hodi ajuda Timor-Leste nia dezenvolvimentu.
Iha fatin hanesan, Xefe Delegasaun, Ashwani Bajaj, agradese tanba bele hasoru malu ho Primeiru-Ministru, Xanana Gusmão. slot online
Nia informa delegasaun sira mai ne’e kada reprezentante setór sira hanesan turizmu, infraestrutura, produtu konsumu, agrikultura no plantasaun sira. Sira-nia prezensa ne’e nu’udar vizita dahuluk mai Timor-Leste hodi esplora oportunidade investimentu iha área oioin.
“Ami foin mai Timór. Ami haksolok tebes atu apreende liután no haree oportunidade saida de’it mak iha hodi ita serbisu hamutuk. Iha buat barak ne’ebé ita bele halo hamutuk, iha turizmu, agrikultura, infaestrutur no seluk tan ne’ebé bele dezenvolve liután”, hateten.
Iha biban ne’e, delegasaun ne’e mós fó parabéns ba Timor-Leste ba adezaun ba Asosiasaun Nasaun sira Sudeste Aziátiku (ASEAN) nian, iha sekuénsia husi anúnsiu ne’ebé halo husi Primeiru-Ministru Malázia, Anwar Ibrahim, durante Simeira ba da-46 husi organizasaun, ne’ebé hala’o foin lalais ne’e iha Kuala Lumpur.
Jornalista : Arminda Fonseca
Editora : Maria Auxiliadora
