DILI, 30 Maiu 2025 (TATOLI)—Ministériu Saúde (MS), sesta ne’e, lansa lista nasionál sosa ai-moruk nune’e bele atende nesesidade ospitál referénsia, sentru saúde no klínika sira iha Timor-Leste.
“Ohin ita halo lansamentu ba lista nasionál sosa ai-moruk nune’e bele atende nesesidade ospitál referénsia, sentru saúde no klínika sira. Atu munisípiu hotu-hotu iha ai-moruk no ekipamentu ne’ebé adekuadu, ha’u hakarak director saúde munisípiu idak-idak atu fahe beibeik informasaun kona-ba estoke ne’ebé atualizadu liuhusi manuál ka dijitál ba Diresaun Nasionál Fornesimentu Farmaséutiku no Médiku (DNFM),” Elia dehan iha nia dskursu, iha MS, Kaikoli.
Iha fatin hanesan, Portavóz Ministériu Saúde, Vidal de Jesus Lopes, esplika lista ai-moruk ne’e kompostu husi item ai-moruk hamutuk 460 husi ospitál, sentru saúde no klínika sira hotu, lista aimoruk ne’e inklui ai-moruk nesesáriu, vitál no esensiál.
“Lista ne’e hanesan matadalan ida. Karik atu kompra ai-moruk sei bazeia ba lista ne’e, tanba lista ne’e peritu timoroan sira mak dezenvolve,” Vidal konklui.
Jornalista: Felicidade Ximenes
Editór: Xisto Freitas da Piedade
