OMS entrega ekipamentu médiku emerjénsia no konsumável ba MS

DILI, 30 Maiu 2025 (TATOLI)—Organizasaun Mundiál Saúde (OMS) iha Timor-Leste entrega ekipamentu médiku emerjénsia, konsumável no fornesimentu materiál esensiál sira ba Ministériu Saúde (MS) atu utiliza iha fasilidade saúde sira hodi fó atendimentu di’ak ba populasaun iha Tmor-Leste.

“Ami ohin entrega ekipamentu médiku esensiál ba Ministériu Saúde hanesan aparellu tensaun arteriál dijitál, balansu dijitál hodi sukat aas (altura) no todan (pezu), konsumável espesífiku ba moras sira seluk hanesan ai-moruk profilaxe malária, rotavirus, sarampu-rubéola no panel test kits, hodi utiliza ba iha fasilidade saúde sira-ne’ebé mak iha,” Reprezentante Organizasaun Mundiál Saúde iha Timor-Leste, Arvind Mathur, dehan iha nia diskursu, Kaikoli, sesta ne’e.

Nia hateten, lista medikamentu esensiál mak parte prinsipál husi polítika nasionál no promove uza medikamentu no kompra efisiente, ho objetivu atu aumenta disponibilizasaun no distribuisaun iha rai-laran tomak.

Tuir nia katak apoiu ida-ne’e sei ajuda aumenta rezultadu servisu sirúrjia no ajuda Hospital Nacional Guido Valadares (HNGV) atu hetan padraun ospitál referénsia nasionál.

Aleinde ekipamentu médiku, OMS mós entrega motór 18 atu sustenta vijilánsia móvel, supervizaun fasilidade no dezplasamentu rápidu iha terenu.

“Sistema forte presiza infraestrutura ne’ebé konfiável. Tanba ne’e, ami kontinua fó apoiu ba investimentu iha simulasaun kompeténsia, ekipamentu klíniku no rekursu ne’ebé salva  moris,” Arvind informa.

Iha fatin hanesan, Ministra Saúde, Elia dos Reis Amaral, hato’o apresiasaun kle’an ba OMS ne’ebé hanesan parseria kontinuada, kolaborasaun téknika no apoiu jenerozu.

“Entrega ida-ne’e nu’udár símbolu ba kompromisu, konfiansa no ita-nia vizaun komún atu harii sistema saúde ida-ne’ebé reziliente no ekuitativu ba kada sidadaun Timor-Leste nian,” Elia subliña.

Nia informa, Ministériu Saúde destaka nesesidade urjente atu asegura katak ospitál sira ekipadu no iha pesoál sira atu jere kualkér aumentu iha nesesidade kuidadu agudu nian tantu mosu hosi halibur malu, insidente imprevistu ka kuidadu médiku emerjénsia rutina.

Nia husu ba diretór sira tau-atensaun ba sasán sira-ne’e, la’ós atu rai iha armazein, maibé atu uza ho ativu iha fasilidade saúde sira no iha terrenu hodi serbí komunidade.

Jornalista: Felicidade Ximenes

Editór: Xisto Freitas da Piedade