BAUKAU, 30 Maiu 2025 (TATOLI)—Progresu konstrusaun moru protesaun mota Samalari, Postu Administrativu Baukau Vila, atualmente atinje ona pursentu 50-resin.
Xefe Suku Samalari, Rui Magno Siqueira, informa moru protesaun referida konstrui iha inísiu tinan-ne’e ne’ebé responsabiliza husi Kompañia Joint Venture ho objetivu satan udan-been ne’ebé kada tinan sempre estraga natar, ai-horis no uma komunidade.
“Ha’u espera kuandu finaliza bele proteje ona natar no uma komunidade ne’ebé kada tinan sempre hetan estragu,” Xefe suku hateten iha Samalari, sesta ne’e.
Rui Sequeira garante katak konstrusaun moru referidu sei termina tuir kontratu tanba iha progresu serbisu di’ak nune’e fó protesaun ba ai-horis iha área mota ninin no asegura natar bele funsiona ho di’ak.
Aleinde ne’e, komunidade hamutuk uma-kain 200 ne’ebé hela husi área mota ninin entre Samalari to’o Laherubi, Suku Buibau, sei seguru liután tanba antes ne’e ameasadu husi mota bainhira udan-boot.
Iha fatin hanesan, Diretór kompañia Mauko Contractions Lda, Saturnino da Costa Belo, hateten progresu serbisu konstrusaun projetu referidu atinje ona kilómetru 1.100 husi totál kilómetru 2.300.
“Ami garante sei finaliza antes kontratu termima,” Saturnino argumenta.
Projetu konstrusaun moru protesaun mota Samalari responsabiliza husi Kompañia Joint Venture kompostu husi kompañia Mauko Contractions Lda no BTK Unipessoal Lda ho durasaun serbisu tinan-tolu no totál orsamentu hamutuk Millaun $3.900.
Jornalista: Natalino Belo
Editór: Xisto Freitas da Piedade
