MS-OMS hala’o marsa saudável hodi selebra Loron Mundiál Tabaku

DILI, 31 Maiu 2025 (TATOLI)—Ministériu Saúde (MS) hamutuk ho Organizasaun Mundiál Saúde (OMS) iha Timor-Leste, sábadu ne’e, hala’o marsa saudável hodi selebra Loron Mundiál Tabaku ne’ebé hahú husi resintu Ministériu Saúde, Kaikoli, to’o iha Largo Lesidere.

“Eventu ida-ne’e hanesan eventu internasionál ne’ebé ita hala’o inklui Timor-Leste. Daudaun ne’e ita hala’o eventu ne’e hodibele sensibiliza informasaun bá ita-nia komunidade atu idak-idak dehan lae ba tabaku,” Diretór Gabinete Lisensiamentu no Rejistu Autoridade Saúde, Nuno da Costa  de Jesus, dehan.

Nia tenik, daudaun ne’e indústria barak mak prodús tabaku hodi hatudu no atrai populasaun atubele fuma, tanba ne’e mak realiza sensibilizasaun ne’e ba família no komunidade katak tabaku ne’e estraga saúde no ekonomia.

Iha fatin hanesan, Reprezentante Organizasaun Mundiál Saúde iha Timor-Leste, Arvind Mathur, hateten OMS no MS la’o hamutuk iha atividade marsa saudável atu harii Timor-Leste ida livre husi tabaku.

“Inspira tebes atu haree belun joven barak halibur iha-ne’e ohin. Tanba, bainhira atu forma futuru ida-ne’ebé saudável liu, seguru liu, ita-boot ka joven sira la’ós de’it parte ida hosi konversasaun, más hanesan sentru konsentrasaun diskusaun nian. Ita-boot sira hatene katak tabaku oho ema ida iha kada segundu,” nia esplika.

Nia haktuir, tabaku mak kauza prinsipál ida ba moras la hada’et (NCDs), hanesan kankru, moras kardiovaskulár, moras respiratóriu no diabetes.

Entretantu, iha marsa saudável ne’e, partisipa másima husi diretór sira husi HNGV, SNAEM,I.P, funsionáriu sira husi Ministériu Saúde no mós OMS iha Timor-Leste (TL).

Jornalista: Felicidade Ximenes

Editór: Xisto Freitas da Piedade