DILI, 31 de Maiu 2025 (TATOLI) – Projetu Portugés iha Bairru, ohin, komemora Loron Mundiál Labarik, ne’ebé seleradu anualmente iha loron 01 Juñu, no nia Aniversáriu ba da-10, iha Sentru Kulturál Jorge Sampaio (CCJS, iha lian portugés), Embaixada Portugal iha Dili, ho dansa, konta istória, rona músika no halimar jogu sira.
Eventu ne’e konta ho prezensa Primeiru-Ministru, Kay Rala Xanana Gusmão, no Embaixadora Porugal iha Timor-Leste, Manuela Bairos. Inisiativa ne’e nia objetivu halibur labarik sira husi Suku Bemori hodi rona istória, rona múzika no halimar jogu sira.
Xefe Governu fó hanoin ba labarik sira kona-ba oinsá ajuda inan ho aman, estuda no kuidadu ambiente.
Embaixadora Portugal iha Timor-Leste afirma katak futuru nasaun ni’an iha labarik sira, tanba ne’e Embaixada, liuhusi Projetu Portugés iha Bairru, habelar lian portugés no agora konta ho apoiu Embaixada Angola iha Timor-Leste sei habelar liutan idioma ida ne’e.
Manuela Bairos lembra katak Projetu ne’e mós hala’o ona iha Munisípiu Vikeke no iha Munisípiu Aileu, liuhusi servisu ho Madre sira hodi halibur labarik sira liu 200 hodi partisipa iha Projetu referidu.
“Ita konsentra hela iha Bemori no iha Aileu atu haree oinsá funsiona mós iha ensinu naun formál. Ita hakarak mós implementa Projetu ne’e iha fatin seluk, tan ne’e iha Embaixada Angola, ha’u hanoin ita servisu hamutuk hodi habelar liutan lian portugés iha bairru sira, fora husi ensinu formál”, diplomata ne’e hateten.
Embaixadora hateten ho Loron Mundiál Labarik, labarik sira husi bairru Bemori mai ho sira nia inan no aman hodi selebra loron ida ne’e.
Tuir Diretora Sentru Lian Portugeza Universidade Nasionál Timor Lorosa’e (UNTL), Maria da Cunha, Projetu Portugés iha Bairru la’os de’it projetu hanorin lian portugés, maibe liliu halibur entre ema, kultura, no hatene. “Espasu ida ne’ebé língua portugeza sai fila fali hanesan meiu, mensajen, dalan, fatin no ferramenta ba koñesimentu, empatia, komunikasaun, asertiva no respeitu mutuál”, nia haktuir.
Jornalista: Jesuína Xavier
Editora: Isaura Lemos de Deus
