Horta propoin programa lideransa ba jerasaun foun hafoin tuir Diálogu Shangri-La
DILI, 01 Juñu 2025 (TATOLI)—Prezidente Repúblika, José Ramos Horta, fila-hikas ona mai Timor-Leste hafoin halo vizita traballu ba Singapura hodi tuir Diálogu Shangri-La 2025, fórum altu nível ne’ebé diskute asuntu seguransa iha rejiaun Ázia-Pasífika.
Bainhira to’o iha Aeroportu Internasionál Preidente Nicolau Lobato, Komoro, Dili, Prezidente Horta hato’o asuntu importante lubuk ida ba mídia sira, inklui hanoin estratéjiku sira hodi prepara jerasaun futura líder Timor-Leste nian.
“Ida-ne’e ba dala tolu ha’u hetan konvite ba fórum ne’e. Diálogu Shangri-La koñesidu nu’udár enkontru prestijiadu ida-ne’ebé jeralmente hetan partisipasaun hosi Ministru Defeza no Xefe Estadu sira hosi nasaun oinoin,” José Horta dehan iha Aeroportu Internasionál Prezidente Nicolau Lobato, domingu ne’e.
Nia afirma, iha edisaun tinan ida-ne’e, sai nu’udár oradór prinsipál iha painél ida-ne’ebé inklui mós Ministru Defeza Austrália nian no kontribui ba sesaun espesiál ida ba líder joven sira iha Ázia-Pasífiku.
Inisiativa importante ida-ne’ebé Prezidente Horta lori durante vizita ne’e maka proposta ba programa formasaun espesiál ba lideransa ba jerasaun foin-sa’e Timor-Leste nian.
Programa ne’e dezeña atu rekruta timoroan ho idade tinan 30 to’o 40, ho lisensiatura ka mestradu no iha abilidade lian Inglés, ne’ebé sei tuir formasaun badak maibé intensivu iha Singapura.
“Ha’u propoin ba Primeiru-Ministru Singapura atu kria programa espesiál ida ba Timor, iha forma formasaun intensivu ba tempu badak iha lideransa, polítika esterna, ekonomia, finansa, no administrasaun públika. Kandidatu hotu-hotu tenke preparadu ba futuru governu nian,” nia dehan.
Tuir Xefe Estadu, proposta ne’e hetan benvindu husi Singapura no iha poténsia atubele realiza iha tempu badak nia laran.
José Horta esplika, programa ne’e bele dura loron lima to’o sanulu kada módulu, no fó dalan ba partisipante idak-idak atu tuir formasaun dala tolu to’o dala lima.
“Ha’u haree entuziazmu husi líder Singapura nian ba ideia ida-ne’e. Se la’o tuir planu programa ida-ne’e bele hahú lalais,” nia akresenta.
Jornalista: Felicidade Ximenes
Editór: Xisto Freitas da Piedade
