DILI, 01 Juñu 2025 (TATOLI)—Primeiru-Ministru, Kay Rala Xanana Gusmão, husu ba sidadaun hotu-hotu atu kuidadu ambiente atu labele prejudika biodiversidade iha tasi.
“Tanba saida mak mundu selebra Semana Oseanu nian? Ida-ne’e bolu ita hotu atu kuidadu ambiente. Se ita la kuidadu ita-nia aan agora, ita nia jerasaun futura sira sei sofre hosi alterasaun klimátika sira-ne’ebé kauza hosi asaun ema-nian,” Xanana dehan bainhira halo abertura ba Loron Mundiál Ambiente no Oseanu nian, iha Tasi Tolu, domingu ne’e.
Tuir nia katak soe lixu plástiku, lata no sasán sira seluk, sei hamate ikan no kria ambiente ne’ebé fo’er, tan ne’e Semana Mundiál Oseanu nian hamosu kestaun sira-ne’e hotu.
Xefe Governu ne’e esplika, Timor-Leste lokalizadu entre nasaun sira-ne’ebé boot liu ho indústria CO2 ne’ebé dezenvolvidu. Maski nasaun ne’e prodús CO2 uitoan, Xanana husu ba ema hotu atu kuidadu ambiente.
“Timor-Leste hanesan nasaun ki’ik ida no illa ki’ik ida mak iha biodiversidade tasi nian ne’ebé riku liu iha mundu,” nia haktuir.
Iha biban ne’e, Primeiru-Ministru husu ba timoroan sira atu investe iha ekonomia, liuliu ekonomia azúl.
“Labele tuir de’it kursu komputadór no teknolojia ba serbisu iha eskritóriu. Ita iha rikusoin hosi tasi, Governu sei kria parke ka sentru ekonomia azúl iha Ataúru nune’e timoroan sira bele aprende liután,” nia informa.
Selebrasaun Loron Mundiál ne’e iha loron 8 fulan-Juñu, nune’e mundu no Timor-Leste selebra loron ne’e durante semana mundiál.
Iha abertura, Governu sei hala’o atividade hanesan hamoos tasi husi ekipa observasaun Internasionál no kompetisaun dezeñu palásiu ho área husi estudante sira.
“Ami iha atividade oinoin durante semana ida iha-ne’e no iha munisípiu sira. Iha-ne’e ami limpeza iha tasi-ibun no iha tasi-laran no kompetisaun hosi estudante sira,” Xanana konklui.
Jornalista: Felicidade Ximenes
Editór: Xisto Freitas da Piedade
