APC Vikeke rejista uma kain 10 afetadu ba dezastre naturál
VIKEKE, 02 Juñu 2025 (TATOLI)—Autoridade Protesaun Sivil (APC, sigla portugés) munisípiu Vikeke rejista uma kain 10 afetadu ba dezastre naturál, banhira akontese udan-boot no anin-boot ne’ebé akontese iha fulan-Maiu liuba ne’e.
Komadante APC munisípiu Vikeke, Cirilio Soares Gomes, informa akontesementu udan-boot no anin iha fulan-Maiu ne’ebé ho volune boot, maibé númeru dezastre ne’e tun kompara ba tinan kotuk ne’ebé rezulta lista vítima ba dezastre naturál ne’e mosu aas tebes.
“Akontese udan-boot no anin iha fulan-Maiu, liuliu iha loron 30 no loron 31 Maiu ne’e ita haree intensidade udan-boot no anin makaas, maibé númeru dezastre afetadu me’e tun. Nune’e iha fulan-Maiu ne’e ita rejista uma-kain 10 mak sai afetadu ba dezastre naturál ne’ebé ami rejista ona,” Cirilio Soares Gomes hateten ba Agência TATOLI iha ninia kna’ar fatin Sira-Lari, ohin.
Komandante APC munisípiu Vikeke ne’e hatutan, tipu dezastre ne’ebé arfeta ba uma kain 10 ne’e kompostu husi aat totál hamutuk uma kain haat (4), aat naton iha uma kain lima (5) no aat kmaan ne’e iha uma kain rua (2) ne’ebé kauza husi anin no udan-boot.
“Uma kain 10 hetan dezastre ekipa APC dezloka kedas ba fatin akontesementu hodi halo verifikasaun ba uma sira estragu ne’e. Kona-ba apoia pakote emerjénsia hanesan food item no naun food item ne’e ita fó ona ba vítima sira,” nia dehan.
Rekuperasaun, nia dehan, APC Vikeke aprezenta ona dadús afetadu sira-nian ba nasionál hodi hein aprovasaun kona-ba apoiu materiál rekuperasaun.
“Vítima afetadu ba dezastre naturál iha fulan-Maiu nian, ita haruka ona lista naran ba nasionál, ne’ebé hein rezultadu husi nasionál,” nia hateten.
Entretantu, uma kain 10 ne’ebé afeta ba dezastre naturál ne’e kompostu husi postu Vikeke Vila uma kain hitu (7), Uatulari uma kain rua (2) no Ossú uma kain ida (1).
Jornalista : Vitorino Lopes da Costa
Editór : Cancio Ximenes
