DILI, 02 Juñu 2025 (TATOLI)—Vise-Prezidente Adezaun Organizasaun Mundiál Komérsiu no ASEAN iha Kámara Komérsiu Indústria Timor-Leste (CCI-TL-sigla portugeza), Sidónio da Costa Freitas, husu ba Governu atu prepara polítika ida-ne’ebé mak di’ak hodi apoiu negósiu iha Timor-Leste banhira tama ba Nasaun Sudeste Aziátiku (ASEAN-sigla ingleza).
“Ita tenke prepara ita-nia produtu ne’e ho kuantidade ne’ebé mak boot no tenke hadi’a no ita mós apoiu nafatin Governu atu prepara fasilidade saida mak bele apoiu ba setór privadu, liuliu ita husu ba Governu atu prepara polítika saida mak atu apoiu negósiu iha Timor-Leste, hanesan sertifikadu lisensa no mós fasilita tan lojístika ne’ebé mak di’ak liu no hadi’a infraestutura nune’e produtu sira-ne’ebé iha área rurál bele lori mai to’o iha fatin konsentradu,” Sidónio hateten ba TATOLI, iha nia kna’ar fatin, CCI-TL, Akait, Dili, segunda ne’e.
Nia husu Governu loke armazein bele tau hamutuk sasán produtu sira, nune’e bele prepara lori sasán bá rai-li’ur no mós bele lori sasán mai iha rai-laran no fasilita prosesu administrasaun tama no sai hodibele fasilita di’ak liután.
“Daudaun ne’e atu sai membru ASEAN, ne’e duni saida mak ita tenke prepara hanesan ita-nia produtu saida mak ita lori bá iha ita-nia konsumidór sira, entaun ita haree katak ita agora tama bá ASEAN, loke ita-nia merkadu no ita-nia produtu bele mós distribui bá ASEAN no produtu saida mak iha Timor laiha ita bele mós lori husi ASEAN mai Timor,” nia esplika.
Tuir Sidónio, CCI-TL hanesan uma ida atu fó hanoin ba agrikultór sira atu sira bele aumenta produtu ka hadi’a produtu ho nia kualidade sira no sira mak sei identifika merkadu atu lori sira-nia produtu bá ne’ebé no atu simu produtu saida mak mai.
“Ami hanesan uma ida atu fó hanoin de’it ba setór privadu sira. Tanba ne’e, ami husu oinsá hasa’e produtu foos iha rai-laran. Entaun, CCI-TL apoiu oinsá atu aumenta foos, no mós CCI-TL mós ajuda agrikultura sira-ne’ebé mak mai atu buka sira-nia parseria liuliu dezenvolve produtu sira-ne’ebé mak di’ak iha merkadu internasionál hanesan vanila, kakau, kafé. Entaun, ami enkoraja agrikultor sira katak sira bele investe iha área produtu sira-ne’e banhira iha ona sosa na’in-sira husi rai-li’ur, sira bele aumenta sira-nia produsaun,” nia konklui.
Jornalista: Felicidade Ximenes
Editór: Xisto Freitas da Piedade
