KOVALIMA, 02 Juñu 2025 (TATOLI) – Udan boot ne’ebé akontese durante semana-ne’e hodi fó prejudika estrada ligasaun husi postu Tilomar ba iha postu administrativu Fohorem no Fatumea kotu, nune’e difikulta movimentu transporte públiku no privadu, iha munisípiu Kovalima.
Ho nune’e Prezidente Autoridade Munisípiu (PAM) Kovalima, Miguel Armada Cardoso uza-nia kompeténsia orienta ba empreza WTJ Unipesoál Lda hodi normaliza estrada hodi fasilita sirkulasaun viatura sira.
“Ita hatene durante loron hira akontese udan hodi halo estrada kotu hotu, maibé liuhusi kompeténsia autoridade munisípiu Kovalima liga empreza WTJ Unipesoál Lda, halo normalizasaun estrada liga entre Tilomar ba Fohorem no Fatumea ne’ebé kotu iha área Halis”, Autoridade Kovalima, Miguel Armada Cardoso, informa ba TATOLI, iha nia servisu fatin, AMC, ohin.
Autoridade Kovalima orienta empreza WTJ normaliza estrada iha área Halis husi postu Tilomar ba iha postu Fatumea no Fohorem iha loron Domingu 01 Juñu ne’ebé Prezidente Autoridade Munisípiu Kovalima, Miguel Armada Cardoso, akompaña husi Administradór postu administrativu Tilomar, Venancio Sarmento ho diretór Servisu munisipál Obra Públika observa empreza normaliza estrada referida.
Autoridade Kovalima mós dehan, udan ne’ebé akontese la’ós estrada Tilomar liga ba Fohorem ho Fatumea de’it mak kotu maibé estrada iha postu sira seluk mós kotu nune’e presiza halo normalizasaun.
“Ohin ha’u kontaktu ona Institutu Jestaun Ekipamentu, Institutu Públiku ( IGE,I.P), preparadu no tula ona ekipamentu pezada nune’e bele dezloka ona mai iha munisipiu Kovalima, nune’e bele halo normalizasaun estrada ne’ebé kotu ne’ebé Servisu Munisipál Obra Públika identifika ona pontu estrada ne’ebé kotu atu halo normalizasaun”, nia informa.
Kona-ba bainhira mak atu halo normalizasaun estrada ne’ebe kotu iha postu sira seluk, hanesan Prezidente Autoridade munisipiu (PAM) Kovalima, ohin, foin simu kontaktu husi enjiñeiru ne’ebé daudaun ne’e iha ona dalan dezloka mai iha munisípiu Kovalima atu normaliza estrada ne’ebé mak kotu iha postu administrativu sira husi munisípiu Kovalima.
Jornalista: Celestina Teles
Editór : Rafael Ximenes de A. Belo
