KOVALIMA, 02 Juñu 2025 (TATOLI) – Prezidente Autoridade Munisípiu (PAM) Kovalima, Miguel Armada Cardoso rekomenda pontu neen ba Ministru Planeamentu no Investimentu Estratéjiku (MPIE), Francisco Gastão Sousa, atu halo konstrusaun ba edifísiu Administrasaun no asembleia, ponte, hadi’a estrada husi munisípiu ba postu administrativu, irrigasaun, dada bee-moos no konstrui ospitál referénsia.
“Ami-nia edifísiu autoridade PAM, no edifísiu asembleia tanba hetan ona aprovasaun maibé liuhusi planu ami atu muda ba fatin seluk nune’e kontrola ba administrasaun bele responde komunidade nia preokupasaun”, Miguel Armada Cardoso hato’o liuhusi nia diskursu iha salaun AMC, ohin.
Autoridade ne’e dehan, alende konstrusaun edifísiu, presiza mós hadi’a estrada husi munisípiu ba postu administrativu sira hanesan Tilomar, Fatumea, Fatululik no Fohorem tanba bainhira tempu udan komunidade sira difísil atu halo movimentu ho transporte públiku no privadu.
Pontu ba datoluk, presiza konstrui mós ponte tanba Kovalima iha mota lubuk ida. Pontu ba da-haat, presiza konstrui irrigasaun hodi distribui bee ba natar tanba Kovalima potensiál ba agrikultura nune’e rai barak sei abandona.
Ba dalimak, presiza dada bee-moos ba komunidade iha Kovalima tanba komunidade sira kontinua halerik atu asesu ba bee-moos. Pontu ba da-neen atu haree mos ospitál referénsia daudaun ne’e identifika liuhusi Planu Dezenvolvomentu Integradu Munisipál (PDIM) orsamentu la naton
“Presiza haree mós merkadu rejionál maske identifika no ami rai ona osan balun, maibé labele konstrui iha kapitál nune’e muda ba suku Beko, Postu administrativu Suai, Munisípiu Kovalima maibé presiza orsamentu”, nia dehan.
Hatan ba rekomendasaun sira ne’e, Ministru Francisco Gastão Sousa hateten, “Kona-ba pedidu sira ohin ha’u sei anota maibé fó hatene ba ita-boot sira foin lalais aprova ona estrada pakote rua, estrada husi estrada suku Ogues ba postu Maukatar tempu-besik sei mai halo lansamentu fatuk ba dahuluk no kona-ba irrigasaun Maukola asina ona kontratu”.
Governante ne’e hatutan, kona-ba merkadu konstrusaun edifísiu asembleia munsipál tanba atu prepara 2027 implementa kamara munisipál presiza mós kapasitasaun nune’e Ministériu sei aloka orsamentu atu kapasita funsionariu públiku iha área balun.
Entretantu, MPIE iha Timor-Leste elabora planu no programa estratéjiku atu guia dezenvolvimentu sustentavel no inkluzivu ba tinan 2025-2029. Planu ida-ne’e foku ba área estratéjika haat: ordenamentu territóriu, planeamentu integradu no investimentu estratéjiku, dezenvolvimentu infraestrutura, no dezenvolvimentu institusionál, ho objetivu atu dudu kreximentu sosiuekonómiku transformativu no hadi’a kualidade moris sidadaun hotu-hotu.
Notísia relevante: https://tatoli.tl/2025/02/28/mpie-lansa-website-no-planu-estratejiku-ba-periodu-2025-2029/
Jornalista: Celestina Teles
Editór : Rafael Ximenes de A. Belo
