DILI, 02 Juñu 2025 (TATOLI) – Reprezentante povu iha uma-fukun Parlamentu Nasionál (PN) levanta kestaun kona-ba estrada no ponte, iha reuniaun plenária, ohin, no husu ba Ministériu Obra Públika (MOP) atu tau atensaun urjente hodi normaliza iha tempu udan.
”Estrada nasionál iha Ermera ho Bobonaro, inklui área Kovalima nia kondisaun grave tebes. Tanba ne’e, husu ba MOP atu orienta IGEADI, I.P normaliza estrada husi Gleno, Letefoho, Atsabe mai Ermera bá Hatulia hodi fasilita komunidade sira fa’an sira-nia kafé, tanba agora tempu kafé nian”, deputadu CNRT, Domingos Augusto ‘Deker’, aprezenta ohin.
Nia salienta katak iha área postu Kailaku mós presiza normaliza estrada no diresaun Bobonaro bá Zumalai, Lolotoe-Suai hodi fasilita komunidade hala’o movimentasaun lori produtu bá fa’an.
Deputadu CNRT, Mateus da Cruz, mós husu atu normaliza mota iha suku Uma Boot iha Vikeke Vila, tanba foin lala’is akontese udan ne’ebé sobu komunidade nia uma kuaze 16. Aleinde ne’e, husu atu aselera normalizasaun ponte Welolo iha Vikeke.
Iha sorin seluk, deputadu FRETILIN, Dário Madeira, informa estrada no ponte ida iha Dilór-Uetua mós kotu no ema labele asesu.
“La’ós ida ne’e de’it, ponte ida kotu iha suku Uma Tolu [Vikeke] durante tinan naruk ona. Ema balun bá hasai foto ona, to’o agora labele hadi’a”, nia preokupa.
Lamentasaun seluk mós hato’o husi deputadu CNRT, Gabriel Soares, kona-ba ponte Lamara iha parte tasi-mane.
“Loron hirak liubá, iha tasi-mane udan kuaze loron haat. Atu ultrapasa ponte Lamara kotu, tenke hein to’o kalan mak bele liu no sa’e fali iha reabilitasaun dalan ida iha suku Mane Haat, temi Uebeliuk ne’e agora ameasa atu kotu. Rekomenda ba kompañia ne’ebé atu bá halo ne’e hadi’a didi’ak dalan ne’e, tanba dalan ne’e públiku atu transporte hotu asesu bá munisípiu hira”, dehan.
Deputadu CNRT, Saul Salvador, koloka mós asuntu sosial ne’ebé mai husi komunidade kona-ba estrada Bee Mean ne’ebé liga husi postu Zumalai bá Bobonaro, ne’ebé baskolante ida monu tanba kondisaun dalan ladi’ak.
“Dezde 2024 levanta hela de’it, maibé seidauk hadi’a. Tuir fali estrada iha postu administrativu Fohoren ne’e mós kotu. Iha kompañia lokál ida mak fó kontribuisaun aterru filafali hodi populasaun sira bele uza”, realsa.
Nune’e, nia husu MOP karik prosesu aprovizionamentu ba estrada sira ne’ebé Konsellu Administrasaun Fundu Infraestrutura (KAFI) aprova ona maka iha trimestre daruak bele aselera.
Deputadu FRETILIN, António Calau, haktuir katak semana kotuk hala’o kontaktu eleitorál no rona preokupasaun husi komunidade mota Karau Ulun iha Same ne’ebé husu atu aselera konstrusaun sira.
Reprezentante Governu, liuhusi Vise-Ministru Asuntu Parlamentár, Adérito Hugo, rejista preokupasaun hirak ne’e no sei enkamiña ba entidade tutela hodi bele fó resposta.
Jornalista: Nelson de Sousa
Editora: Maria Auxiliadora
