SEFOPE Vikeke kontinua oferese formasaun lian inglés faze daruak ba joven 200
VIKEKE, 02 Juñu 2025 (TATOLI)—Sekretáriu Estadu Formasaun Profisionál Empregu (SEFOPE) munisípiu Vikeke, kontinua oferese formasaun lian englés ba kandidatura traballadór Austrália ba faze daruak ba joven na’in-200.
Diretór Sekretáriu Estadu Formasaun Profisionál Empregu (SEFOPE) munisípiu Vikeke, Norberto Pereira Martins, haktuir agora daudaun SEFOPE munisípiu Vikeke kontinua tuir formasaun lian englés ba faze daruak nian la’o hela no joven kandidatura partisipa másimu.
“Formasaun lian englés ba kandidatu traballadór Austrália ne’ebé uluk tuir teste valór la to’o ne’e, agora sira tuir hela formasaun faze daurak ne’e durante fulan tolu. Depois fulan tolu hotu hafoin formadór sira kontinua fó teste ba sira, karik liu foin hetan sertifikadu,” Norberto Pereira Martins ba Agência Tatoli, iha ninia kna’ar fatin, administrasaun Vikeke, ohin.
Formasaun ba lian englés sai importante ba joven sira hodi prepara-aan la’ós ba nasaun Austrália de’it, maibé agora Governu halo ona kooperasaun ho nasaun seluk hanesan Nova Zelandia atu fasilita joven sira servisu iha ne’ebá.
“Tanba ne’e, ita haree iha formasaun faze daruak ne’e ita-nia joven sira partisipa ativu tebe-tebes. Oportunidade barak mak sei mai la’ós Austrália de’it, Governu mós halo kooperasaun ba Nova Zelandia hodi simu ita-nia traballadór sira husi Timor. Tan ne’e, joven mak tenke prepara aan hodi hein oportunidade servisu ba rai-li’ur,” nia dehan.
Nia relata, formasaun ba faze daruak ne’e formandu hamutuk na’in-200 mak daudaun ne’e partisipa hela formasaun iha munisípiu Vikeke.
“Lolos ne’e ita-nia formandu ba faze daruak hamutuk na’in-300 mak partisipa formasaun lian englés, maibé balun eskola no balu servisu entaun agora tuir formasaun ne’e hela 200,” nia hateten.
Nune’e mós, nia dehan, formadór ba lian inglés iha munisípiu Vikeke hamutuk na’in-haat (4), maibé na’in ida (1) mak hatama ona karta rezignasaun tanba liu vaga profesór nian, nune’e daudaun ne’e hela formadór na’in-rua (2) no koordenadór na’in-ida (1).
“Ba oin, ita sei hatama fali formadór na’in ida (1) hodi hanorin ita-nia joven sira,” nia dehan.
Jornalista : Vitorino Lopes da Costa
Editór : Cancio Ximenes
