DILI, 02 Juñu 2025 (TATOLI)-Sekretáriu Estadu ba Igualdade (SEI), Elvina Sousa Carvalho, ho Prezidente Komisaun Funsaun Públiku (KFP), Agostinho Letêncio, segunda ne’e hasoru malu hodi ko’alia konaba planu kria mekanizmu oinsá garante inkluzaun no asediu seksuál iha instituisaun Estadu sira.
“Ohin Sekretáriu Estadu Igualdade ho ekipa mai vizita no halo enkontru ho Prezidente Komisaun Funsaun Públiku, atu haree ba asuntu igualdade iha komisaun funsaun públiku no mós ko’alia kona-ba problema ligadu ho asédiu seksuál. Importante bele haree ba oin oinsá servisu hamutuk hodi garante igualdade iha komisaun funsaun publika nia laran no mós garante inkluzaun iha komisaun funsaun públiku nia laran”, SEI dehan ba jornalista sira iha KFP Matadouru hafoin enkontru.
Elvina Sousa dehan rezultadu hosi enkontru entre parte rua mak atu kria grupu traballu ida, oinsá asegura igualdade inkluzaun iha Timor-Leste.
“Ohin iha diskusaun kle’an no naruk tebes, ami sai ho rezultadu ida maka sei kria grupu traballu ida, ne’ebé maka haree oinsá asegura no promove igualdade inkluzaun iha komisaun funsaun públiku nia laran no mós haree ba problema sira no haree mós asédiu seksuál iha funsaun fúbliku nia laran”, afirma.
Governante ne’e dehan inísiu ne’ebé di’ak tebes, hakle’an no hametin liután kooperasaun servisu hamutuk entre KFP ho SEI iha futuru.
“Ha’u hanoin asédiu seksuál iha mekanizmu ne’ebé maka estabelesidu ona iha komisaun funsaun públiku kona-ba oinsá bele responde bainhira iha asédiu seksuál iha funsaun públiku nia laran. Funsaun públiku ne’ebé maka estabelesidu hodi bele responde no mós halo investigasaun ba kualker kazu ne’ebé maka mosu ka aprezenta keixa ba komisaun funsaun publika. Tanba ne’e maka ohin parte rua tuur hamutuk hodi haree mekanizmu atu mellora liután iha futuru”, akresenta.
Prezidente KFP, Agostinho Letêncio, apresia no onradu ba vizita ne’e, tanba ida-ne’e hola parte ida husi funsaun komisaun públika nian planu reforma.
“Ami hakarak halo mós aprosimasaun ba kada membru governu atubele iha oportunidade para diskute asuntu ne’ebé relevante no espesífiku ba kada liña ministeriál. Tanba ne’e, maka ohin ho vizita Sekretáriu Estadu Igualdade, ida-ne’e oportunidade di’ak ida mai ami hanesan ohin hato’o ona, ami bele halo diskusaun detalladu no foka de’it ba asuntu jéneru nian”, nia dehan.
Notísia relevante: SEKOMS-SEI servisu hamutuk promove igualdade inkluzaun
Jornalista : Osória Marques
Editora : Rita Almeida
