DILI, 03 Juñu 2025 (TATOLI)—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hateten Komandu PNTL daudaun ne’e hein hela despaxu husi Ministru Interiór molok anúnsia vaga rekrutamentu ba membru PNTL foun.
Nia dehan, orsamentu ba rekrutamentu membru PNTL foun ne’e Komandu Jerál PNTL koloka iha tinan ne’e.
“Orsamentu ita koloka ona. Dokumentu ita aprezenta ona ba Ministru Interiór. Agora, parte téknika Ministériu Interiór liuhusi Gabinete Jurídiku haree hela, seráke ida-ne’e loos ona ka lae? Se loos ona, despaxu mai ita para bele forma ona komisaun hodi realiza rekrutamentu,” Henrique hateten ba jornalista sira hafoin tula diviza ba membru PNTL na’in-hitu ne’ebé moras, iha Bekora, tersa ne’e.
Nia apela ba públiku atu labele fiar boatu sira-ne’ebé la’o iha públiku katak rekrutamentu polísia loke ona.
“Hakarak apela ba iha públiku tanba balun dalaruma fó-sai informasaun falsa ruma ne’ebé dehan agora ne’e prepara ona dokumentu tanba halo ona rekrutamentu. Ha’u hakarak hateten katak seidauk iha despaxu formál ruma ba rekrutamentu,” nia afirma.
Henrique husu ba joven sira-ne’ebé interese atu tama bá iha polísia ninian, prepara saúde, prepara fízika no prepara mós mentál di’ak atubele kompete bainhira fó-sai ona despaxu formál kona-ba rekrutamentu.
Jornalista: Natalino Costa
Editór: Xisto Freitas da Piedade
