DILI, 03 Juñu 2025 (TATOLI) – Komunidade Ordo Fratrum Minorum (OFM) Timor prontu ona atu hala’o novena ho relíkia Santu António hahú husi loron 04 to’o 12 Juñu 2025 iha fatin oioin iha Timor-Leste.
Prezidente Fundasaun OFM Timor, Padre Andreas Hamma, OFM, hateten tinan ida ne’e, devosaun sarani katólika sei sai solene liután ho prezensa relíkia rua husi Santu António nian, ne’ebé idaidak tau iha Kapela Santu António de Pádua Fomentu II-Dili no Parókia Fatuberliu ne’ebé fusiona ho Parókia Alas, Manufahi.
Nia esplika novena Santu António ne’e rasik sei hala’o iha fatin prinsipál haat mak hanesan Kapela Santu António de Padua Fomento II-Dili, Parókia Fatuberliu, Parókia Alas no Kapela São Miguel Arcanjo Fatumea-Kovalima.
“Ida-ne’e hodi hatudu sarani aumenta husi tinan ba tinan, ita-nia preparasaun ba atividade ne’e komisaun daudaun hahú ona dada tenda no seluk tan iha kapela Fomentu, Dili, nian hodi akomoda númeru peregrinu sira ne’ebé tuir estimativa boot tebes iha misa ne’ebé sei realiza iha 12 Juñu taka novena nian”, Padre Andreas Hamma dehan ba Tatoli, ohin.
Nia subliña atividade sira ne’ebé hala’o durante novena ne’e iha mós misa loroloron, devosaun, venerasaun relíkia sira, novena pesoál, nune’e mós iha bazár ne’ebé nakonu ho hahán, hemun, no atrasaun múzika husi komunidade.
Tuir nia, destake prinsipál iha tinan ida-ne’e maka prezensa husi relíkia auténtika rua husi Santu António mak relíkia iha Díli mai husi Pádua, Itália, iha ne’ebé Santu António mate no hakoi, enkuantu relíkia iha Fatuberliu mai husi Lisboa, Portugál, nia moris fatin.
“Relíkia husi Pádua, molok misa no tau iha altár lorloron durante novena. Tinan ne’e, espesiál duni tanba kongregasaun bele halo devosaun diretamente iha relíkia Santu António nia oin”, Padre Andreas subliña.
Nia adianta, atividade sira ne’e nu’udar parte ida husi planu longu prazu nian, OFM Timor sei harii mós sala meditasaun espesiál ida iha Kapela Santu António de Padua nia sorin iha Dili. Sala ne’e sei sai fatin permanente hodi rai relíkia sira no fó asesu ba ema sira ne’ebé hakarak halo meditasaun ka reza privadu liuhusi devosaun ba Santu António nian.
Novena ne’e sei kulmina iha loron 12 fulan Juñu tinan 2025 ho santa misa ne’ebé sei lidera diretamente husi Don Virgílio Kardeál do Carmo da Silva, SDB. Kardeál nia prezensa ne’e aumenta tan solenidade selebrasaun tinan ida-ne’e nian, iha ne’ebé iha misa ne’e sei envolve mós amu-lulik sira husi orden oioin, hanesan Salezianu sira Don Bosco nian (SDB), Karmelita sira, Diosezanu sira, no klaru katak amu-lulik Fransiskanu sira rasik.
“Devosaun Santu António nian la’ós de’it ba sarani Katóliku sira, maibé mós ba ema hotu ne’ebé sente presiza forsa no esperansa nian ho laran-haksolok atu mai tau esperiénsia ba Santu António hodi sente”, Padre Andreas hateten.
Aleinde ne’e, iha loron 13 Juñu, misa ba Festa Santu António nian sei lidera diretamente husi Frei Kons Bahang OFM nu’udar bainaka espesiál OFM nian husi Indonézia.
Eventu sosiál ne’ebé akompaña novena tinan ida-ne’e nian lori konseitu Café Esperança nian, evolusaun ida husi “Café Espirituál” iha tinan hirak liubá. Naran ne’e foti husi tema Tinan Jubileu Esperansa lori husi komunidade Katólika Timor-Leste iha tinan ida-ne’e.
Aleinde ne’e, fornese fatin ida atu halibur, han, no hemu, kafé ida-ne’e mós hanesan espasu ida ba sasin, iha-ne’ebé ema fahe sira-nia esperiénsia espirituál liuhusi devosaun ba Santu António.
Komunidade OFM Timor rasik dadaun kompostu husi irmaun 25 ho Votu Perpétua (irmaun no adre), inklui irmaun na’in-tolu husi Indonézia, irmaun joven 30 ho Votu Temporáriu, ne’ebe estuda hela filozófia no teolójia, nune’e mós postulante na’in-16, no frater na’in-6 iha Tinan Kanóniku.
Husi maun-alin sira Votu Eternu nian, na’in-4 sai ona diákonu, no iha planu atu hetan ordenasaun nu’udar padre iha Indonézia iha loron 11 Jullu 2025.
Padre Andreas hato’o mensajen katak importánsia devosaun nu’udar fonte forsa espirituál hodi hasoru dezafiu sira tempu nian, tantu relasiona ho família, serbisu, moras, ka asuntu sosiál sira seluk.
“Santu António hanesan santu ida ne’ebé ema hadomi liu iha mundu. Nia estátua ne’ebé kaer kosok-oan Jezús hanesan símbolu ida kona-ba ninia besik espirituál ba Maromak, no klaru, ba ema sira ne’ebé terus”, nia hateten.
Novena Santu António nian sei hala’o loron-loron iha tuku 18h30 otl iha ne’ebé ema hotu, husi background saida de’it, hetan konvite atu asiste no sente bensaun devosaun nian ba Santu António.
Jornalista: Arminda Fonseca
Editora: Maria Auxiliadora
