DILI, 03 Maiu 2025 (TATOLI)-Universidade da Páz (UNPAZ) servisu hamutuk ho Heavenly Culture, World Peace, Restoration of Light (HWPL) no mós Arte Moris, halo promosaun ba dame no hakmatek iha Timor-Leste liuhusi pinta morru sira ne’ebé iha UNPAZ.
“Ida-ne’e programa ida ne’ebé HWPL hala’o ona desde 2003, iha tinan 2003 sira mai halo konferénsia iha UNPAZ hodi envolve lider sira, liu-liu ba instituisaun akadémiku sira atu partisipa hodi promove pás”, dehan Reprezentante Reitór UNPAZ, atuál Dekanu Fakuldade Siénsia Sosiál, Fernando Dias Gusmão, ba jornalista sira iha UNPAZ, tersa-ne’e.
Nia dehan Arte Moris hala’o ona pintura ba morru sira iha Dili laran ho tema moris hakmatek no pás iha Timór.
“Agora ita hakarak iha instituisaun sira akadémika sira iha interasaun entre dosente ho estudante sira, ita tenke introdús kestaun pás nia, ita tenke hakribiit violénsia sira, tanba pás ne’e buat ida-idak tebes atu moris hakmatek no armonia iha ita-nia nasaun”, nia hatutan.
Prezidente Asosiasaun Arte Moris, Iliwatu Danabere, informa programa ne’e rasik apar ho sira nia misaun.
“Ami kolabora ho sira-nia programa, nune’e ho HWPL foin 2023, maibé ami pinta parede kona-ba dame hahú husi krize 2006 nia no mós antes ne’e ami pinta mós kona-ba istória kultura ita-nian kada munisípiu”, katak nia.
Nia hatutan programa ne’e rasik halo parte husi sira-nia misaun, nune’e nia sente kontente tanba husi pintura bele fó mensajen dame nian.
“Ami sente kontente tanba di’ak mak husi pintura fó mensajen dame nian ba ita-nia rain, tanba HWPL hanesan organizasaun mundiál ho sira-nia misaun boot”, nia realsa.
Diretór Jerente HWPL, Joseph Whang, dehan eventu ne’e hala’o hodi komemora aniversáriu ba dala-10 hosi fundasaun no proklamasaun Deklarasaun Pás no Hapara Funu (DPCW – Declaration of Peace and Cessation of War).
Nia afirma, ida-ne’e maka momentu ida reflesaun koletiva nian ne’ebé halibur ema sira hosi orijen oioin, no konklui ho atuasaun ida ne’ebé book ema nia laran hosi Koru Labarik sira Dame nian.
Programa Formasaun Edukadór Pás nian hala’o iha Timor-Leste iha tinan 2024, ne’ebé partisipa husi dosente sira husi UNPAZ. Sira kompleta formasaun ho susesu no hetan sertifikasaun nu’udar Edukadór Pás HWPL.
Nia haktuir, husi tempu ne’ebá, edukadór sira-ne’e lori edukasaun ba pás iha saladeaula UNPAZ nian hodi haburas jerasaun foun ida husi defensór pás nian. Aleinde atividade akadémika sira, HWPL no UNPAZ mós envolve ativamente estudante sira iha atividade oioin ho tema dame nian.
Iha tinan 2024, estudante UNPAZ sira partisipa iha kompetisaun hakerek ho tema Loron Rai (Earth Day) nian, enkuantu iha tinan 2025 sira partisipa iha kompetisaun diskursu konta istória kona-ba dame. Partisipasaun entuziazmu husi estudante sira hatudu sira nia kompromisu maka’as atu harii sosiedade ne’ebé pasífika.
“Hanesan parte ida husi ninia esforsu sira atu kuda valór sira dame nian iha ema nia moris, HWPL lansa ninia projetu mural dame nian dahuluk iha 2023. Projetu ne’e hakarak hametin valór sira hamutuk nian, promove mutualizmu, envolve jerasaun foun sira, no hametin relasaun sira entre membru komunidade sira”, dehan nia.
Mural dahuluk iha projetu ne’e pinta iha Sentru Desportu Xanana ho tema: Hadomi Ha’u-nia An, Hadomi Ha’u-nia Família, Hadomi Ha’u-nia Rain, Hadomi Dame, no Hadomi HWPL.
Atividade ida-ne’e sai posível tanba apoiu jenerozu hosi Vinod Patel no dedikasaun hosi artista sira hosi Arte Moris no estudante voluntáriu sira hosi universidade oioin.
Notísia relevante: Arte Moris promove dame no konserva kultura liuhusi atividade “arte luron”
Jornalista : Osória Marques
Editora : Rita Almeida
