DILI, 06 Juñu 2025 (TATOLI) – Ministru Defeza, Donaciano do Rosário Gomes, aprezenta projetu dekretu-lei kona-ba kondisaun atribuisaun subsídiu no suplementu remuneratóriu nian ba FALINTIL-Forsa Defeza Timor-Leste (F-FDTL) no aprova ona husi Governu.
Tuir nota ne’ebé Tatoli asesu, objetivu husi diploma ida-ne’e mak atu regula no atualiza loloos suplementu sira ne’ebé fó ba militár F-FDTL sira, ne’ebé aprova husi dekretu-lei númeru 34/2021, loron 22 fulan-Dezembru, altera husi dekretu-lei númeru 85/2022, loron 23 fulan-Novembru, hodi rekoñese ezijénsia espesífika karreira militár nian no nesesidade atu dignifika servisu ne’ebé presta ba nasaun ne’e.
“Medida ne’e hakarak mós atu hadi’a lakuna no diskrepánsia sira ne’ebé eziste iha rejime anteriór, hodi konsidera evolusaun husi kustu moris nian no reforma foin lalais ne’e iha administrasaun públika”, dokumentu ne’e esplika.
Proposta ne’e mós aplika ba militár ativu ka rezerva hotu-hotu, iha servisu efetivu, no estabelese valór no kondisaun atu atribui suplementu oioin, hanesan suplementu ba kondisaun militár, suplementu ba atividade espesiál, suplementu frekuenta kursu iha estranjeiru, suplementu ba komandu no xefia, subsídiu transporte, subsídiu ba dezlokasaun servisu no subsídiu alimentasaun nian.
“Ida-ne’e hodi define kritériu uniforme no transparente atu fó apoiu hanesan ne’e, diploma ne’e asegura jestaun rekursu públiku ida ne’ebé efisiente liu no promove justisa no ekuidade iha Forsa Armada nia laran”, dehan.
Tuir dokumentu ne’e, autorizasaun ba atribuisaun suplementu idaidak sei depende ba proposta husi unidade militár no despaxu husi Xefe Estadu Maiór-Jenerál Forsa Armada. Suplementu ne’e sei garante de’it durante períodu iha ne’ebé mantein kondisaun ne’ebé justifika nia.
Governu aprova mós Kódigu Onra ba Militár F-FDTL
Aleinde ne’e, Governu aprova mós Kódigu Onra ba Militár F-FDTL. Adosaun ba Kódigu ida-ne’e ho objetivu atu afirma prinsípiu étiku, valór morál sira no konduta ezemplár ne’ebé tenke orienta militár F-FDTL hotu-hotu, hodi kontribui ba hametin kultura organizasionál no identidade institusionál Forsa Armada nian.
“Kódigu ne’e nu’udar instrumentu fundamentál ida atu konsolida kultura militár ida ne’ebé demokrátika, bazeia ba legalidade, dixiplina, profisionalizmu no servisu ba Nasaun”.
Kódigu Onra ne’e aplika ba pesoál militár F-FDTL hotu-hotu no reforsa kompromisu ba Konstituisaun, legalidade, respeitu ba sidadaun sira-nia direitu no apartidarizmu rigorozu husi Forsa Armada. Ninia objetivu prinsipál sira maka prevene hahalok ne’ebé la apropriadu, promove imajen públika ida ne’ebé iha integridade no valoriza misaun F-FDTL nian iha servisu ba povu timoroan.
Jornalista: Arminda Fonseca
Editora: Maria Auxiliadora
