DILI, 04 Juñu 2025 (TATOLI) – Konsellu Ministru autoriza asinatura memorandu entendimentu rua entre Ministériu Juventude, Desportu no Kultura no Federasaun Futeból Timor-Leste (FFTL), nu’udar parte husi parseria estratéjika hodi hametin infraestrutura futeból nasionál nian.
Memorandu dahuluk prevee konsesaun husi Estádiu Munisipál Dili nian ba federasaun ba períodu tinan 25, ho objetivu atu reabilita no hadi’a infraestrutura ne’ebé iha, hodi uza finansiamentu husi fundu ida FIFA nian.
Nune’e memorandu daruak estabelese parseria ba dezeñu, konstrusaun, dezenvolvimentu, jestaun no manutensaun ba estádiu futeból foun ne’ebé sei harii iha sidade Dili.
“Proposta rua ne’e mak ha’u aprezenta ba iha Konsellu Ministru no hetan aprovasaun husi membru Governu sira. Pur tantu, ita iha ona luz verde husi Governu atu esplora Estádiu Munisipál Dili no aumenta tan infraestrutura balun atu hadi’a estádiu Dili. Segunda proposta maka atu harii estádiu foun iha Tasi-Tolu, ho kapasidade 15.300 lugares bá adeptu sira”, Nilton Gusmão hateten via telefone, ohin.
Nia esplika kona-ba konstrusaun estádiu foun ne’e, tuir planu, molok ramata tinan ne’e tenke hahú ona.
“Ita hakarak implementasaun konstrusaun estádiu ne’e tenke hahú ona, tanba FIFA disponivel atu ajuda fundu ruma hodi tau hamutuk ho Governu hodi harii estádiu foun ne’e, maibé tenke hahú iha tinan ne’e. Se liu tinan ne’e, automatikamente ita la iha interese tan atu halo ita-nia estádiu foun hamutuk ho Governu”, adianta.
Nia relata iha konsellu Ministru hothotu konkorda katak iha Agostu ka Setembru tinan ne’e lansa ona konkursu públiku para projetu iha Timor-Leste.
“Estimativa ba konstrusaun estádiu foun ne’e, ita hanoin atu investe pur volta millaun $20. Estádiu ne’e ita planu sei harii iha estasionamentu karreta sira-nian, ita [sei uza] halo serimónia misa Santu Padre ni’an”, nia konklui.
Jornalista: Arminda Fonseca
Editora: Maria Auxiliadora
