VIKEKE, 04 Juñu 2025 (TATOLI)—Diretór Servisu Ministériu Agrikultura Peska no Pekuária (SMAPPF) munisípiu Vikeke, Olivio Soares Freitas, informa iha époka 2025 ne’e konstrui irrigasaun ba natar iha área Dardau, suku Vessoru, postu Uatulari, MAPPF Vikeke halo espansaun ka tetu natar foun hamutuk ektare 120.
Irrigasaun Dardau ne’ebé lokaliza iha Vessoru iha tinan 2023 agrikultór sira halo de’it natar kuaze ektare 340 ne’ebé funsiona, enkuantu natar sira seluk sai abandonadu tanba ai-horis mak moris okupa iha natar laran ne’e.
“Natar parte Dardau nian ai-horis mesak hun boot barak mak moris nakonu iha natar laran, entaun difikulta ita la konsege halo natar. Nune’e, iha tinan 2025, MAPPF mobiliza ekipamentu pezadu ba Dardau hodi hamoos tiha ai-horis sira moris iha natar laran kuaze ektare 120, no agora funsiona fila-fali ona,” Olivio Freitas Soares hateten ba Agência Tatoli iha nia kna’ar fatin, ohin.
Nia dehan, daudaun ne’e natar sira funsiona no distribuisaun bee ba natar di’ak, nune’e agrikultór parte Vessoru hahú kuda haree no balun kari de’it tanba ai-abut balun sei iha rai okos ne’ebé sira haree de’it.
“Foin lalais ne’e, ita apoia tratór boot mak ba dada kabubu, ne’ebé agora ita-nia agrikultór sira namanas kuda hare no kari hare ba natar. Ba área Dardau, ha’u sente tinan ida-ne’e produsaun sei sa’e tanba ita konsege halo espasaun ona,” nia dehan.
Tuir dadus, natar área irrigasaun totál ektare 460, iha tinan 2023 funsiona ne’e ektare 340, iha tinan 2025 funsiona tán ektare 120, entaun totál natar ne’ebé funsiona ne’e hamutuk ektare 460.
Enkuantu natar área Dardau ne’ebé fó benifísia ba abitante Suku Vessoru kompostu husi aldeia hitu hanesan Balabasiba, Mau-Boru, Culu-Dere, Baha-o, Uani-Uma, Baha-Buga no Matau ho totál populasaun 1.519, kompostu husi mane 785 no feto 734 (tuir sensu tinan 2015).
Jornalista : Vitorino Lopes da Costa
Editór : Cancio Ximenes
