DILI, 04 Juñu 2025 (TATOLI) – Governu deside Ministériu Ensinu Superiór, Siénsia no Kultura (MESSK) atu asume jestaun ba East Timor Coffee Institute (ETCI) ka Institutu Kafé Timor-Leste, ne’ebé lokaliza iha Gleno, Ermera.
Aleinde delibera ba Ministru Ensinu Superiór, Siénsia no Kultura, José Honório Jerónimo, atu asume jestaun ba ETCI no Konsellu Ministru aprova mós projetu espesífiku ida ba institutu ida-ne’e ho hanoin atu reforsa formasaun rekursu umanu iha setór agríkola, liuliu iha setór kafé, produtu esportasaun prinsipál Timor-Leste nian.
“ETCI Ermera entrega ba Governu. Ministériu sei haree no sei ko’alia ho estrutura ETCI hodi haree, tanba Governu nia hanoin atu foku de’it ba siénsia kafé nian. Tinan oin ita bele hahú prosesu. Instituisaun ne’e la’o tinan 20 ona más sira iha problema ba jestaun, liuliu iha finanseiru”, José Honório hateten iha Palásiu Governu, ohin.
Nia dehan tanba ne’e liuhusi Parlamentu Nasionál no fundadór sira mesak veteranu sira mak hakarak entrega ba Governu, depoizde halo enkontru ho sira halo análize ba sira-nia situasaun atuál tenke lori relatóriu mai iha Konsellu-Ministru ohin no deside katak sira entrega ba Governu.
“Ha’u tenke ko’alia ho sira para haree no rezolve sira-nia kondisaun iha tempu badak. Ministériu sei forma ekipa ida hodi haree saida mak Governu bele halo uluk iha tempu badak ne’e, maibé sira hatene ona katak hakarak duni entrega ba Governu, tanba ETCI ne’e rasik uluk harii husi veteranu sira no intelektuál Ermera oan sira ne’ebé to’o faze ida ohin sira hakarak entrega tanba laiha kbiit atu kontinua operaliza eskola ne’e rasik”, konklui.
Jornalista: Arminda Fonseca
Editora: Maria Auxiliadora
