MPIE atualiza investimentu fundu petrolíferu iha área infraestrutura ba Xefe Estadu
DILI, 04 Juñu 2025 (TATOLI)–Ministru Planeamentu Investimentu Estratéjiku (MPIE), Gastão Souza, kuarta ne’e, iha Palásiu Prezidensiál, Bairru Pite, hasoru malu ho Prezidente Repúblika José Ramos Horta hodi atualiza kona-ba investimentu fundu petrolíferu ne’ebé antes ne’e investe ba iha área infraestrutura.
“Ha’u atualiza kona-ba área infraestrutura nian, tanba Prezidente Repúblika hakarak hatene investimentu fundu petrolíferu ne’e ne’e iha área infraestrutura ne’e ba saida-saida, ida-ne’e mak ha’u mai esplika. Kona-ba Orsamentu Jerál Estadu (OJE) tinan 2025, osan hira mak aloka ba fundu infraestrutura no impréstimu hira, projetu hira mak la’o no hira mak la la’o, sira-ne’e mak ha’u mai esplika,” Ministru Gastão hateten ba jornalista sira hafoin ramata enkontru ho Xefe Estadu.
Nia esplika, daudaun ne’e iha KAFI projetu hamutuk 1300 maibé projetu hirak ne’e balun iha kontratu no balun projetu emerjénsia liu husi ajudikasaun direta.
“Atu hateten katak, projetu agora iha KAFI hamutuk 1300, sira-ne’e la’ós iha hotu kontratu, maibé iha 400-resin mak iha kontratu balun mai husi tinan hira ba kotuk, restu ne’e projetu emerjénsia. Ida-ne’e mak semana oin ami sei konvida membru Governu hotu-hotu atu deside katak projetu ida-ne’ebé mak tau nafatin iha lista hodi kontinua no finansia iha tinan oin. Maibé ba projetu ne’ebé la la’o ami sei haruka para tanba iha área barak prioridade tebes atu ita bele ezekuta ka implementa iha tinan oin,” Gastão hateten.
Iha tinan 2025 hahú janeiru-juñu projetu hamutuk 77 mak konklui ona iha aprovizionamentu no liu ona konkursu ho orsamentu hamutuk millaun $165. Nune’e, iha projetu hamutuk 99 mak sei iha prosesu aprovizionamentu no projetu hirak ne’e sei konklui iha tinan 2025 tuir programa Governu nian ne’ebé iha aprova iha Parlamentu Nasionál.
“Balun ne’ebé liuhusi projetu emerjénsia lubuk ida, ida-ne’e ha’u ladún lembra hira no orsamentu hira, depois tempu ruma ha’u sei fó sai kona-ba projetu emerjénsia sira-ne’. Ha’u atu fó sai mais orsida bele la-loos,” nia dehan.
Projetu hirak ne’e mak hanesan estrada, irrigasaun, Postu Polísia iha Dili no Munisípiu, Postu Saúde, Saladeaula ba alunu sira no seluk tan.
Iha okaziaun ne’e, Ministru ne’e atualiza mós ba Xefe Estadu kona-ba prosesu aprovizionamentu hira mak konklui no hira mak seidauk konklui.
“Iha diskusaun Prezidente Repúblika, iha hanoin balun atu tau atensaun ba infrastrutura sira iha área fronteira husi Batugade to’o Suai Kovalima, hanesan estrada, Postu Saúde, Eskola no seluk tan. Maibé buat sira-ne’e iha reuniaun Konsellu Administrasaun Fundu Infrastrutura (KAFI), ha’u sei aprezenta para membru KAFI bele hatene saida mak bele halo iha tinan oin,” nia dehan.
Jornalista : Hortencios Sanchez
Editór : Cancio Ximenes
