Pasiente besik 200 konsulta no opera matan iha HoREX
BAUKAU, 03 Juñu 2025 (TATOLI)–Pasiente besik na’in-200 durante loron-lima hala’o konsulta no operasaun matan iha Ospitál Rejionál Eduardo Ximenes (HoREX-sigla portugeza).
Téknika matan iha HoREX, Laurinda Guterres, esplika programa referidu realiza entre HoREX no Hospital Nacional Guido Valadares (HNGV) ba komunidade iha parte Baukau ho alvu ba pasiente sofre moras matan hanesan moras katarak, laukoma teresium no pekista.
“Operasaun ba paseinte kuaze 200 durante loron lima. Ohin sira hahú iha klínika komesa operasaun ona,” Laurinda Guterres hateten iha HoREX, Vila Nova, Baukau, tersa ne’e.
Nia salienta, tékniku sira kontinua hala’o operasaun ba pasiente sira nune’e bele rekupera matan liuliu sofre tipu katarata konjenitál, inklui idade avansadu no kauza husi trauma.
HoREX kontinua hala’o atendimentu hanesan halo tratamentu matan nian no halo operasaun matan, enkuantu paseinte kategoria labarik kontinua transfere ba HNGV tanba iha Baukau menus dotór espesialista.
“Kuaze maioria pasiente sira-ne’e idade 40-resin. Labarik ida mak konjenitál ita labele halo operasaun iha-ne’e, ita tenke transfere ba Dili,” nia fundamenta.
Jornalista: Natalino Belo
Editór: Xisto Freitas da Piedade
