DILI, 04 Juñu 2025 (TATOLI)—Prokuradór Jerál Repúblika, Nelson de Carvalho, apresia servisu Polísia Sientífika Investigasaun Kriminál (PCIC-sigla portugeza) no enkoraja PCIC atu oferese investigasaun ne’ebé kualidade molok submete ba Ministériu Públiku.
“Apresia tebes sira-nia servisu. Entermu servisu, durante ne’e sira fornese ba Ministériu Públiku dadus no faktu. Enkoraja nafatin sira (PCIC) atu halo servisu ho kualidade,” Nelson hateten ba jornalista sira hafoin halo vizita ba edifísiu PCIC, Kolmera, kuarta ne’e.
Nia agradese ba konvite husi Diretór PCIC hodimai vizita PCIC para haree direta servisu investigadór PCIC nian inklui fasilidade ne’ebé agora daudaun PCIC iha, hanesan laboratóriu, ezame balístika no DNA.
Iha biban ne’e, PJR Nelson mós haktuir katak hafoin simu tiha pose hanesan Prokuradór Jerál Repúblika, delega kedas kompeténsia ba prosesu hamutuk 433 ba Polísia Sientífika Investigasaun Kriminál atu kontinua halo investigasaun.
Iha fatin hanesan, Diretór PCIC, Vicente Fernandes e Brito, agradese ba Prokuradór Jerál Repúblika, Nelson de Carvalho, ne’ebé bele hatán pedidu PCIC hodimai vizita ba PCIC.
“Señor Prokuradór Jerál Repúblika, bele haree ho matan kona-ba servisu iha área investigasaun kriminál no servisu iha laboratóriu Forénsiku, tanba ko’alia kona-ba investigasaun ba krime sira-ne’ebé organizadu, ne’e kompleksu no tranznasionál. Ita presiza rekolla prova ne’e iha prova pesoál no prova materiál,” nia esplika.
Vicente haktuir durante PJR nia vizita mai PCIC, halo diskusaun kona-ba servisu PCIC nian liga ho investigsaun no ko’alia mós katak iha futuru, PCIC hanesan órgaun polísia kriminál ne’ebé fó apoiu ba iha Ministériu Públiku no Tribunál atu alkansa susesu investigasaun kriminál nian.
Jornalista: Natalino Costa
Editór: Xisto Freitas da Piedade
