SEFOPE no parseiru sosiál sira partisipa ILC 2025 iha Jenebra
DILI, 04 Juñu 2025 (TATOLI) – Sekretaria Estadu Formasaun Profisionál no Empregu (SEFOPE) hamutuk ho parseiru sosiál sira tuir Konferénsia Internasionál Traballu (ILC, sigla inglés) ba da-113 ne’ebé realiza husi Organizasaun Internasionál Traballu (OIT) iha Jenebra, Suisa, hahú iha loron 02 to’o 13 Juñu 2025.
Tuir nota imprensa ne’ebé Tatoli asesu, delegasaun Timor-Leste lidera husi Sekretáriu Estadu Rogério Araújo Mendonça ne’e kompostu husi reprezentante SEFOPE sira, Konfederasaun Sindikatu Timor-Leste (KSTL), nune’e mós Kámara Komérsiu Indústria Timor-Leste (CCI-TL). Sira-nia prezensa ne’e ko’alia kona-ba foti desizaun relasiona ho polítika empregu internasionál.
Fórum internasionál ida-ne’e hanesan enkontru anuál boot liu ne’ebé partisipa husi reprezentante kada Governu, emprezáriu, no traballadór husi nasaun membru ILO hamutuk 187.
Iha fórum tinan ne’e, asuntu estratéjiku ne’ebé diskute mak ko’alia kona-ba protesaun ba traballadór sira husi perigu biolójiku, serbisu desente iha setór ekonomia dijitál (plataforma), no esforsu tranzisaun husi ekonomia informál ba ekonomia formál.
Konferénsia ne’e nu’udar fórum importante ida ba nasaun membru sira atu hatuur padraun traballu globál no diskute polítika estratéjika sira ne’ebé apoia direitu traballadór no justisa sosiál nian.
OIT subliña justisa sosiál mak sai fundamentu prinsipál atu mantein dame mundiál ne’ebé sustentAvel.
Nu’udar órgaun tripartida úniku ne’ebé iha auspísiu Organizasaun Nasaun Unida (ONU) nian, OIT dezde 1919 enkoraja ona diálogu sosiál entre Governu, empregadór sira, no traballadór sira iha dezeñu programa sira ne’ebé promove serbisu desente ba ema hotu.
Ekipa delegasaun Timor-Leste nian tuir planu sei envolve ativamente iha sesaun plenária oioin, enkontru tékniku sira, no konsulta rejionál sira durante konferénsia.
Jornalista: Arminda Fonseca
Editora: Maria Auxiliadora
