BAUKAU, 05 Juñu 2025 (TATOLI)—Autoridade Administrasaun Munisipál (AAM) Baukau, kinta ne’e, hamutuk ho parseiru lokál realiza diskusaun kona-ba revizaun Planu Dezenvolvimentu Munisipál (PDM) ba tinan-lima mai.
Sekretáriu Munisipál Asuntu Planeamentu Investimentu no Dezenvolvimentu, Eduardo Filipe Ximenes esplika, diskusaun revizaun PDM referidu bazeia ba diploma ministeriál Minisrériu Administrasaun Estatal (MAE) numéru 82/2024 ne’ebé sai matadalan ba munisípiu sira atu halo diskusaun liuliu revee fali PDM tinan-2019-2023.
“Ita halo revizaun ida-ne’e atu halo aliñamentu tuir programa XI Governu Konstitusionál nune’e sai hanesan dokumentu iha munisípiu hodi introdús ba Planu Asaun Anuál,” Sekretáriu Munisipál Asuntu Planeamentu Investimentu no Dezenvolvimentu hateten iha Salaun Apuramentu Vila Nova, Baukau.
Eduardo salienta, konsulta públika ne’e sei foku ba setór haat importante hanesan dezenvolvimentu sosiál hanesan área edukasaun, saude no inkluzaun sosiál, dezenvolvementu institusionál hanesan área kapasitasaun liuhosi formasaun no treinamentu, infraestrutura foku ba estrada, bee-moos inklui eletrisidade no setór ekonomia foku ba planu dezenvolvimentu agrikultura no turizmu.
Nia argumenta, bazeia ba PDM anteriór ne’ebé aprova define katak vizaun Munisípiu Baukau iha futuru sai nu’udár sidade metropolitana maibé importante Baukau-oan hotu presiza fó liman no hanoin ba malu no unidu hamutuk dezenvolve Baukau.
“Hanesan munisípiu ita tenke iha prinsípiu ba dezenvolve nune’e iha aliñamentu ba meta ne’ebé definida ona,” Eduardo akresenta.
Entretantu, etapa sira kona-ba revizaun PDM hahú ho diskusaun iha nivel munisípiu no sei kontinua halo konsultasaun iha baze hanesan postu administrativu sira antes halo apresiasaun iha reuniaun Konsellu Koordenasaun no Konsultivu Munisipál inklui sei hetan aprovasaun iha Konsellu Ministru.
Jornalista: Natalino Belo
Editór: Xisto Freitas da Piedade
