Artista Vidigal Pinto baixa iha HNGV
DILI, 04 Juñu 2025 (TATOLI)—Artista Vidigal Pinto, daudaun ne’e baixa iha Hospital Nacional Guido Valadares (HNGV) iha sala Very Important Person (VIP) tanba sofre moras komplikadu.
Diretór Servisu Apoiu Diagnóstiku no Terapéutiku HNGV, Vidal de Jesus Lopes, informa pasiente Vidigal Pinto baixa iha sala VIP númeru hitu (7), iha-ne’ebé parte hosi Sirúrjia no Ortopedic hala’o hela intervensaun ba nia moras.
“Ita-nia maluk Vidigal Pinto moras duni. Parte Sirúrjia no Ortopedic halo ona intervensaun ba nia moras iha dentru baixa ne’e,” Vidal hateten ba jornalista sira, iha nia kna’ar fatin, HNGV, kuarta ne’e.
Responsavel ne’e esplika, pasiente Vidigal Pinto moras durante tinan barak nia laran, no daudaun hala’o tratamentu iha HNGV kuaze semana ida resin ona.
“Nia mai baixa iha-ne’e purvolta semana ida resin ona. Nia moras ne’e kle’ur ona no komplikadu, nune’e doutór sira halo ona intervensaun no kondisaun jerál la’ós pior liu, maibé di’ak hela,” nia relata.
Kona-ba planu atu halo transferénsia ba rai-li’ur ne’e, nia esplika, depende ba nia moras ne’ebé mak iha. Bainhira sira deside dehan labele mak sira ba aprezenta iha junta médiku hodi diskute karik prenxe kritériu bele haruka bá rai-li’ur.
“Planu atu halo tratamentu iha rai-li’ur ne’e, bainhira doutór sira labele halo atendimentu iha-ne’e. Se doutór sira halo ona atendimentu iha-ne’e, signifika laiha ona planu atu halo tratamentu iha rai-li’ur,” nia subliña.
Lopes afirma, bainhira transfere pasiente bá rai-li’ur tenke prenxe rekizitu sira-ne’ebé mak eziste, tanba iha Hospital Nacional Guido Valadares mós iha doutór espesialista ne’ebé mak sufisiente atubele atende pasiente.
“Loos duni, ita-nia hakarak haruka bá rai-li’ur, maibé tenke rekizitu balun iha-ne’e, nune’e sira bá karik atu halo saida tanba ita iha-ne’e mós espesialista barak bele halo intervensaun ba kazu sira-ne’e,” nia konklui.
Jornalista: Felicidade Ximenes
Editór: Xisto Freitas da Piedade
