Top

Atuasaun hasoru arguidu 13 ba krime droga la tuir prosedimentu legal

Tribunál Judisiál Primeira Instánsia Dili. Imajen TATOLI/Natalino Costa

DILI, 05 Juñu 2025 (TATOLI)—Tribunal Judisiál Primeira Instánsia Dili (TJPID), kinta ne’e, kontinua halo debate instrusaun ba kazu atividade ilisitu droga ne’ebé envolve husi arguidu na’in-13 iha 2022 molok avansa ba julgamentu.

Iha debate instrusaun ba kazu referida iha sala julgamentu, Tribunál kontinua rona depoimentu husi sasin antigu diretór Servisu Nasionál Intelejénsia ho inisiál GMP.

Iha sala julgamentu, sasin GMP deklara ba Tribunál katak momentu ne’e nia mak nu’udár diretór ba servisu nasionál intelejensia, nune’e nia rekoñese katak atuasaun ne’ebé mak ekipa SNI halo momentu ne’ebá hasoru arguidu na’in-13 ne’ebé envolve atividade ilisitu droga la tuir prosedimentu legál tanba momentu ekipa ba halo atuasaun ba arguidu sira-ne’e lori ba asegura fila-fali iha edifisiu SNI.

Nia esplika, tuir lei númeru 3/2009 kona-ba kriasaun Servisu Nasionál Intelijénsia ne’e mak SNI nu’udar instituisaun ne’ebé halo papel servisu ne’ebé foku ba servisu intelijénsia, rekolla informasaun, verifika informasaun no relata inklui halo papel ida mak komunika.

Signifika kuandu asegura sidadaun ida-ne’ebé suspeitu ba atividade ilísitu ba droga ne’e tenke komunika lalais ba autoridade kompetente hanesan Polísia Sientífika Investigasaun Kriminál (PCIC, sigla Portugés) atu halo investigasaun ba ema sir-ne’e, tanba PCIC mak iha kompeténsia atu haree ba kestaun ne’e, enkuantu SNI laiha kompeténsia ba ida-ne’e kuandu kaer ema entrega kedan ba PCIC.

Sasin deklara, SNI ne’e nu’udar instituisaun ne’ebé nia servisu konjuntam ne’ebé kompostu husi polísia, militár inklui pesoál SNI rasik.

Nia dehan, momentu ne’ebá hafoin kaer tiha arguidu na’in-13 ne’e, ekipa SNI la komunika ba iha PCIC hodi entrega arguidu sira-ne’e maibe SNI lori kedan argudu ba asegura iha edifisiu PCIC.

Momentu ne’eba, bainhira ekipa SNI lori arguidu sira ba iha edifisiu SNI, ekipa sira informa ba nia no hanesan Diretór SNI momentu ne’e nia hasee kedan membru sira katak ekipa sira-nia atuasaun ne’e la tuir prosedimentu legál.

“Klaru ne’e la loos, lei mak ko’alia. Operasaun no atuasaun ba argudu sira-ne’e la tuir lei. Tanba sira lori fali arguidu sira mai edifisiu SNI, maibé SNI la hateten nune’e. Tuir lei ne’e, PCIC kompetente ba ida ne’e,” nia deklara.

Sasin hatutan, momentu ne’ebá hafoin ekipa SNI lori tiha arguidu mai edifisiu SNI, hanesan Diretór SNI, nia halo kedan relatóriu no komunika kedan ba PCIC hodi entrega arguidu sira ba Polísia Sientífika Inevstigasaun Kriminál hodi kontinua submete ba prosesu kontinuasaun.

Iha fatin hanesan, sasin ho inisiál F hateten ba Tribunal katak momentu ne’e nia hola parte iha servisu konjunta tanba hetan orientasaun husi dirijente SNI katak ba buska arguidu sira-ne’ebé envolve atividade ilisitu droga.

Ho nune’e, iha debate instrusaun ne’e, Ministériu Públiku ne’ebé reprezenta husi Prokuradór Matias Soares husu Tribunál atu kazu atividade ilisitu droga ne’ebé envolve arguidu na’in-13 ne’e prienxe rekezitu krime no prosedimentu legál tanba ne’e solisita ba Tribunál atu avansa ba julgamentu.

Hatán ba kestaun ne’e, defeza husi arguidu AA no A, Advogada Privada Soraya Marques solisita ba Tribunál atu absolve kazu atividade ilisitu droga ne’ebé envolve husi arguidu na’in-13 lalika avansa ba julgamentu, tanba faktu no provas ne’ebé Ministeriu Públiku arrola iha akuzasaun ne’e la tuir prosedimentu legal, tanba ne’e kazu referida la prienxe atu avansa ba julgamentu.

Hafoin rona tiha parte hotu, Tribunál liuhusi Juis José Quintao marka fali debate instrusaun ba kazu ne’ebé envolve husi arguidu na’in-13 iha tinan 2022 ba fali loron 16 Juñu 2025 iha tuku 14h00 lorokraik, hodi foti desizaun katak kazu ne’e avansa ba Julgamentu ka to’o de’it iha debate instrusaun.

Jornalista : Natalino Costa

Editór       : Cancio Ximenes

Publisidade

Leave a Reply

Latest Post

error: Content is protected !!