Empreza 250 sei partisipa iha Dili International Trade Expo 

DILI, 05 Juñu 2025 (TATOLI) – Empreza internasionál no nasionál hamutuk 250 sei partisipa iha eventu Dili International Trade Expo ne’ebé sei realiza entre 28 Agostu no 01 Setembru tinan ne’e.

Ministru Komérsiu no Indústria, Nino Pereira, informa daudaun ekipa halo hela serbisu koordenasaun, liuliu ba partisipasaun emprezáriu sira iha rai-laran no mós sira husi estranjeiru.

“Ita sei halo koordenasaun ho Ministériu Negósiu Estranjeiru no Koperasaun no liña ministeriál relevante sira hodi fasilita emprezariu sira husi rai-liur ne’e. Ita mós relata ona atividade ne’e ba iha Prezidente Repúblika hodi hato’o mensajen no halo abertura ba Dili International Expo ne’ebé sei realiza iha Sentru Konvensaun Dili”, Nino Perreira hateten iha Palásiu Governu, Dili.

Tuir nia, atividade ne’ebé sei hala’o iha eventu ne’e mak hanesan talk show, matching, negósiu promosaun ba produtu potensiál sira, iha enkontru aprezentasaun oportunidade negósiu nomós investimentu iha Timor-Leste no iha mós asina memorandu entendimentu entre emprezáriu nasionál no internasionál sira. Iha mós aprezentasaun kona-ba deskobrimentu inovadór ne’ebé husi parte universidade, setór privadu sira halo ligadu ba iha produtu industriál ka komersiál.

Nia esplika, atu hahú Dili International Trade Expo, Ministériu Komérsiu no Industria (MKI) no Kámara Komérsiu no Indústria Timor-Leste (CCI-TL, iha portugés) halo ona koordenasaun ba iha empreza lokál sira, negósiu ki’ik, setór privadu sira, inklui emprezáriu sira hodi hala’o atividade halibur negósiu ne’e iha munisípiu sira.

“Produtu barak sei aprezenta iha eventu ne’e hanesan produtu komersiál, artezanatu, no seluk tan. Ita-nia eventu ida-ne’e sei aprezenta buat barak, espera sei iha partisipasaun masima, liuliu husi setór privadu sira”, dehan.

Governante ne’e haktuir, daudaun ne’e Timor-Leste nia esportasaun komersiál ne’e balansu negativu, sasán importadu folin aas tebes kompara ho sasán esportadu. Tanba ne’e, Dili International Trade Expo ne’e krusiál tebes atu promove sasán potensiál ba merkadu internasionál.

Ho Dili International Trade Expo, nia hatutan, sei introdús Timor-Leste nia produtu ba emprezáriu internasionál sira, inklui setór privadu nasionál hodi promove país nia produtu lokál ba merkadu internasionál ho objetivu atu hasa’e esportasaun Timor-Leste nian iha nivel mundiál.

Notisía relevante: Ministru Nino lansa Dili International Trade Expo 2025

Jornalista: Arminda Fonseca 

Editora: Maria Auxiliadora