DILI, 05 Juñu 2025 (TATOLI)—Juiza Administradora Tribunal Judisiál Primeira Instansia Dili (TJPID), Edite Palmira dos Reis, hateten julgamentu movel ne’ebé perkore area juridisaun haat Dili, Aileu, Likisa no Ermera kontinua la’o normál.
“Julgamentu Movel la’o hela. Julgamentu Movel ne’e fulan ida antes juiz sira-ne’ebe atu kaer prosesu ba julgamentu movel sira tenke hato’o planu ba Konsellu Superiór Majistratura Judisiál, nune’e Prezidente Tribunál Rekursu nu’udár Prezidente Konsellu aprova tiha mak foin autoriza juiz sira ba halo Julgamentu Movel,” Edite hateten ba jornalista iha TJPID Kaikoli, kinta ohin.
Nia dehan, Tribunál Movel ninian durasaun semana ida, nune’e juiz sira bele ba to’o semana no juiz sira-ne’ebé envolve iha julgamentu movel ne’e, juiz kolletivu sira bele lori prosesu 30 no prosesu ne’e tenke hotu.
Nia dehan, Tribunál Movel la’o hela iha tinan kotuk no konsege halo julgamentu Movel ne’e da-10 ona no tinan ne’e foin da-rua (2) de’it maibé iha prosesu barak juiz sira finaliza.
Jornalista : Natalino Costa
Editór : Cancio Ximenes
