BAUKAU, 05 Juñu 2025 (TATOLI)—Serbisu Delegasaun Territoriál Floresta, Kafé no Planta Indústria Munisípiu Baukau distribui ona ai-oan hamutuk rihun 24 durante tinan-2025.
Xefe Departamentu Delegasaun Territoriál Floresta, Kafé no Planta Indústria Munisípiu Baukau, António José Lopes, esplika serbisu importante ne’ebé hala’o durante ne’e hanesan halo patrullamentu, sensibilizazaun lei floresta iha baze no reflorestasaun hanesan fahé ai-oan ba komunidade.
“Ita monitoriza nafatin, liuliu antes distribui ita hameno tuir kritériu mak presiza iha lutu nune’e labele hetan estragu husi animál,” António José Lopes hateten iha Vila Nova, Baukau, kinta ne’e.
Floresta Baukau serbisu hamutuk ho parseiru dezenvolvementu sira hanesan Catholic Relief Services (CRS-sigla ingleza) no World Vizion Timor-Leste inklui pedidu direta husi suku ne’ebé distribui ba komunidade sira hanesan iha postu administrativu ualu.
Husi totál ai-oan ne’ebé distribui kompostu ai-mahoni, kaharu, au, teka no ai-fuan sira hanesan sabraka, kulu, haas no seluk tan ne’ebé halo viveiru iha Suku Triloka, Postu Baukau Vila no Saelari, Postu Administrativu Laga.
Aleinde ne’e, Floresta Baukau iha planu atu implementa programa reflorestasaun ba rai Estadu sira iha Munisípiu Baukau maibé nafatin iha difikuldade kona-ba estatutu rai no aleinde ne’e rai ne’ebé iha seidauk seguru tanba bainhira sei hetan estragu husi ema sunu duut no ainimál.
“Ita seidauk iha akordu ruma ho komunidade no autoridade atu oferese rai atu implementa programa reflorestasaun,” Lopes akresenta.
Entretantu, Floresta Baukau liuhosi serbisu patrullamentu rezulta kaptura komunidade ne’ebé tesi no fa’an ai-kameli ilegál hamutuk kazu lima ne’ebé rejista ona iha Ministériu Públiku hodi hein prosesu iha Tribunál.
Apreensaun ne’ebé Floresta halo purvolta 26 estapa inklui ai-kabelak hamutuk kúbiku ualu ne’ebé iha prosesu lelaun.
Jornalista: Natalino Belo
Editór: Xisto Freitas da Piedade
