Top

TR halo alterasaun jurídika ba kazu tentativu omisídiu hasoru traballadór GMN

Edifísiu Tribunál Rekursu. Imajen Tatoli/Francisco Sony

DILI, 04 Juñu 2025 (TATOLI)—Tribunál Rekursu (TR) liuhusi Juíz Deolindo dos Santos, Durante Tilman no Juiza Jacinta Correia deside halo altersaun kualifikasaun jurídika husi Prizaun Preventiva (PP) bá fali medida koasaun Aprezentasaun Períodika (AP).

Alterasaun kualifikasaun jurídika ba medida koasaun Prizaun Preventiva bá fali Aprezentasaun Períodika ne’e bazeia ba rekursu ne’ebé husi defeza arguidu na’in-tolu hanesan CCGC, ENPB, no JHFG submete iha fulan-Abríl tinan ne’e.

Arguidu na’in-tolu CCGC, ENPB no JHFG hetan aplikasaun ba medida koasaun Prizaun Preventiva tanba suspeita ba kazu tentativa omisídiu ne’ebé akontese iha tinan 2022 iha área Vila-Verde, Dili, hodi hakanek (sona) eis traballadór Grupo Média Nacional (GMN) ho inisiál OO.

Nune’e, iha prosesu Primeira Interrogatória iha Tribunál Judisiál Primeira Instánsia Dili aplika medida koasaun ba arguidu na’in-tolu CCGC, ENPB no JHFG liga ho kazu referidu ho Prizaun Preventiva nune’e defeza husi arguidu na’in-tolu submete rekursu kontestasaun desizaun Tribunál Judisiál Primeira Instánsia Dili ba aplikasaun medida koasaun Prizaun Preventiva ne’ebé Tribunál aplika ba nia kliente sira. Nune’e, iha loron 27 Maiu, Tribunál Rekursu hasai desizaun hodi halo alterasaun kualifikasaun jurídika ba medida koasaun ne’ebé Tribunál Judisiál Primeira Instánsia Dili aplika ba arguidu na’in-tolu.

Advogadu privadu arguidu na’in-tolu, Marino da Cruz de Jesus, hateten medida koasaun Prizaun Preventiva ne’ebé Tribunál Judisiál aplika ba nia kliente sira-ne’e Tribunál Rekursu halo alterasaun kualifikasaun jurídika ba medida koasaun ne’e, nune’e arguidu na’in-tolu atu aprezenta aan iha Eskuadra Polísia ne’ebé hela besik ba, semana ida dala ida iha kada loron segunda iha tuku 10h00 Otl hodi hein prosesu investigasaun.

“Tribunál Rekursu hasai ona desizaun ba rekursu ne’e, hodi altera medida Prizaun Preventiva ba iha Medida Aprezentasaun Períodika,” Marino da Cruz de Jesus hateten Tatoli iha TJIPD, Kaikoli, kuarta ne’e.

Rekorda fali katak molok ne’e Tribunál Primeira Instánsia Dili hala’o prosesu primeiru interrogatóriu ba prosesu ne’e. Iha alegasaun husi parte defeza nian, husu Tribunál atu aplika medida Aprezentasaun Períodika ba arguidu na’in-tolu. Enkuantu, husi parte Ministériu Públiku husu atu aplika medida Prizaun Preventiva no ikusmai Juíz Turnu José Quintão, deside hodi aplika medida Prizaun Preventiva, nune’e mak defeza la konkorda hodi hatama rekursu.

Entretantu, arguidu na’in-tolu lori mai iha Tribunál Judisiál Primeira Instánsia Dili, Ministériu Públiku promove ho krime omisídiu agravadu ho forma tentada ne’ebé previstu iha artigu 139.

Tuir kronolojia katak iha loron 12 Abríl 2022, iha Matadouru, Aldeia 01 Setembru, Suku Vila Verde, Postu Administrativu Vera-Krúz, Munisípiu Dili, akontese problema ida-ne’ebé suspeita arguidu na’in-tolu sona lezadu ho inisiál OO, hanesan eis traballadór GMN.

Iha prosesu primeiru interrogatóriu, prezide husi Juíz Turnu José Quintao, Ministériu Públiku reprezenta husi Prokuradór Renato Bere Nahac, arguidu na’in-tolu hetan asisténsia legál husi advogadu privadu na’in-tolu, Arlindo Sanches, Marino da Cruz de Jesus no Napolião de Oliveira.

Jornalista: Natalino Costa

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!