DILI, 06 Juñu 2025 (TATOLI)—Prezidente Komisaun Funsaun Públika (KFP), Agostinho Leténcio de Deus, informa ekipa júri KFP hahú ona validasaun ba rekezitu promosaun grau ba funsionáriu públiku (FP) sira.
“Ekipa KFP deside ona ohin ne’e iha ona ekipa júri sira atu hahú ona halo validasaun ba rekezitu sira-ne’ebé fuinsionáriu públiku sira tenke prienxe. Maibé, agora iha persentajen ne’ebé diferensa ba promosaun regulár 10%. Ida-ne’e ba hotu-hotu no promosaun antiguidade ne’e ita husi grau ida kiik-liu mak grau G ba F ne’e ita tau 90%, katak maiória sira-ne’ebé mak nunka promovida ba grau,” Prezidente KFP ne’e hateten ba jornalista sira iha edifísiu KFP Matadouru, ohin.
Prezidente KFP hateten, tinan oin sira-ne’ebé grau kiik G hela de’it 10% ona, grau F ba leten fó 70%. Grau kiik ne’e persentajen boot enkuantu grau boot persentajen kiiik Grau B ba A nee 10%.
Iha Governu Konstitusionál da-sia (IX), ba tinan ida-ne’e aprova dekretu-lei rua liga ho promosaun ida mak promosaun regulár ne’ebé mak tinan-tinan iha promosaun no ida fali mak promosaun por antigidade katak funsionáriu sira-ne’ebé mak mais de 8 anos kuandu sira prienxe rekezitu ruma ne’ebé mak define sira mak sei tuir teste,” nia dehan.
Prezidente hatutan, ne’e diferensa de’it mak promosaun por antiguidade ne’e la teste ida maibé kuntinua submente kritériu sira-ne’ebé mak iha.
Tuir nota husi Governu, totál vaga promosaun hamutuk 3.540, ne’ebé estabelese husi rezolusaun Governu ida-ne’e, ne’ebé 60 aloka ba kategoria tékniku superiór hamutuk-Grau A, 223 ba Tékniku Superiór Grau B, 561 ba Tékniku Profisionál 561-Grau C, 965 ba Tékniku Profisionál-Grau D, 1.051 ba Tékniku Administrativu Grau E no 680 ba Asistente Grau F.
Relembra katak, iha 25 Setembru 2024, Governu liuhusi reuniaun Konsellu Ministru aprova ona projetu rezolusaun kona-ba vaga ba promosaun pesoál integradu iha rejime jerál karreira administrasaun públika ba tinan 2024.
Vaga sira ba promosaun ne’e fiksa ona tinan-tinan husi Governu, tuir proposta KFP to’o limite 10% husi totál pesoál sira iha kada kategoria ka grupu profisionál.
Husi totál vaga promosaun hamutuk 817 ne’ebé rezolusaun Governu ne’e estabelese, koloka 47 ba kategoria Tékniku Superiór 47-Grau A, 122 ba Tékniku Superiór Grau B, 188 ba Tékniku Profisionál – Grau C, 234 ba Tékniku Profisionál Grau D, 149 ba Tékniku Administrativu – Grau E no 77 ba Asistente-Grau F.
Jornalista : Osória Marques
Editór : Cancio Ximenes
