DILI, 06 Juñu 2025 (TATOLI)—Prezidente Repúblika, José Ramos Horta, liuhusi Diresaun Servisu Sosiedade Sivil no Asuntu Sosiál, lansa primeira pedra hodi konstrui uma dignu ida ba Paulo Gomes ho Espoza Aliança Gomes ho Oan na’in-neen (6) iha aldeia Taiubu, suku Lasaun, postu admistrativu Atsabe, munisipiu Ermera.
Kordenadora Diresaun Servisu Sosial no Assuntu Sosial, Terrsa Dos Santos Ximenes, hateten objetivu ba lansamentu primeira pedra tanba iha momentu balun liu ba observa direita husi Assesór Servisu Sosiál Asuntu Sosiál ho ekipa tun direta hodi survei kondisaun uma família ida ne’e nian, nune xefi suku Lasaun halo proposta haruka ba Prezidente Repúblika no responde kedan ho pozitivamente.
”Ohin, halo de’it lansamentu ba primeiru pedra, akompanha ho admistradór postu admistrativu Atsabe no Xefi Suku Lasaun no autoridade lokál, familia vulneravel sira. Nune’e, ita entrega ba autoridade postu no suku sira atu akompaña prosesu konstrusaun uma ne’e durasaun fulan tolu bele (3) finaliza ona,” Teresa hateten liuhusi nota ne’ebé Agência TATOLI asesu, ohin.
Nia hateten, apoiu hirak ne’e inisiativa Prezidente Republika nian atu fahe domin ba familia ema ho defisiénsia no vulneravel sira-ne’ebé presiza tulun.
Uma referidu ho medida metro 8×7 ne’ebé sei kompleta ho toilet no dapur. Hafoin lansamentu ba uma ne’e, familia vulneravel Paul Gomes ho espoza Aliança Gomes ho oan sira hato’o obrigadu ba Prezidente República tanba bele halo ona uma ida ba sira.
“Ha’u agradece ba avo Ramos fó ona uma mahon ida-ne’e mai ha’u. Uluk, ha’u hela de’it iha fatuk kuak, agora hau bele hela iha uma di’ak ona,” Xefe família ne’e tenik.
Antes ne’e, Prezidente Repúblika halo ona uma ba família vulneravel sira iha teritoriu nasionál, ho fundu ne’ebé Xefe Estadu utiliza balun mai husi nia vensimentu kada fulan no balun mai husi nia amigu sira husi diáspora.
TATOLI
