Xanana apresia Timor-Leste eleitu nu’udar Vise-Prezidente Asembleia Jerál ONU nian
DILI, 06 Juñu 2025 (TATOLI)—Primeiru-Ministru, Xanana Gusmão hato’o nia apresiasaun no satisfasaun ba Timor-Leste nia eleisaun nu’udar Vise-Prezidente ida ba Asembleia Jerál Organizasaun Nasaun Unida (ONU) ba da-80.
“Hodi taka, ha’u hakarak hato’o ha’u-nia satisfasaun ba eleisaun Cabo Verde no Timor-Leste nu’udar Vise-Prezidente Asembleia Jerál Nasaun Unida ba da-80, ho lema ‘Di’ak Liu Hamutuk’ ne’ebé hato’o hosi Prezidente eleitu”, Xanana Gusmão hato’o kestaun ne’e iha sesaun abertura Reuniaun Ministeriál PALOP-TL no Uniaun Europeia ba da-15 ne’ebé hala’o iha Ministériu Negósiu Estranjeiru no Kooperasaun (MNEK), Dili, sesta ne’e.
Nia hein katak, hamutuk ho Prezidente no Vise-Prezidente eleitu sira seluk, Timor-Leste bele fó kontribuisaun signifikativu ba reforma no foti desizaun importante iha ONU ba mundu ne’ebé hakmatek, seguru no armónia.
Lembra katak, Asembleia Jerál ONU nian hili Timor-Leste nu’udar Vise-Prezidente ida husi Sesaun ba da-80 iha loron 02 fulan-Juñu tinan 2025.
Timor-Leste sei hetan reprezentasaun husi nia Misaun Permanente iha ONU, ho Reprezentante Permanente Dionisio Babo Soares responsável ba koordenasaun kna’ar nasaun nian iha determinasaun ajenda no rezultadu husi sesaun hamutuk ho Vise-Prezidente sira no Estadu-membru sira seluk.
Sesaun ba da-80 husi Asembleia Jerál ONU nian, ho tema “Di’ak Liu Hamutuk,” sei hala’o iha fulan-Setembru 2025 to’o fulan-Setembru 2026. Abertura ofisiál marka ona sei hala’o iha loron 09 Setembru tinan 2025 iha Sede ONU nian iha Nova Iorke.
Sesaun ne’e nu’udar fórum anuál ida-ne’ebé halibur reprezentante sira husi Estadu membru ONU hotu-hotu hodi ko’alia kona-ba asuntu globál importante sira inklui pás, seguransa, dezenvolvimentu sustentável, direitu umanu no reforma ba órgaun mundiál.
Asembleia Jerál ba da-80 sei prezide husi Annalena Baerbock, antigu-ministra Negósiu Estranjeiru Alemaña nian. Aleinde Timor-Leste no Kabu Verde, iha Vise-Prezidente na’in-16 seluk ne’ebé reprezenta rejiaun oioin iha mundu, hanesan Andorra, Arjentina, Bangladexe, Repúblika Demokrátika Kongo, Kénia, Líbanu no seluk tan.
Membru permanente na’in-lima husi Konsellu Seguransa ONU nian mak Xina, Fransa, Rúsia, Reinu Unidu no Estadu Unidu – envolve mós ativamente iha estrutura lideransa hosi Asembleia Jerál.
Notisía Relevante: https://tatoli.tl/2025/06/03/timor-leste-eleitu-nuudar-vise-prezidente-asembleia-jeral-onu-ba-da-80/
Jornalista : Arminda Fonseca
Editór : Cancio Ximenes
