DILI, 07 Juñu 2025 (TATOLI)- Tribunál Judisiál Primeira Instánsia Dili (TJPID), sábadu ne’e, halo interrogatóriu dahuluk ba arguidu DM ne’ebé oho nia-fen ho inisiál AM iha aldeia Hatubatu, suku Hatulia-Vila, Munisípiu Ermera, kinta foin lalais ne’e.
Iha prosesu interrogatóriu dahuluk, Ministériu Públiku ne’ebé reprezenta husi Prokuradór Ricardo Leite, promove arguidu ho krime ómesidu no husu Tribunál atu aplika medida Prizaun Preventiva ba arguidu.
Nune’e, Juíz Turnu, José Gonsalves, halo tiha indentifikasaun ba arguidu DM no deside ho despaisu ikus hodi aplika medida koasaun Prizaun Preventiva ba arguidu.
Ho medida koasaun ne’e, Defeza Arguidu, Francisco Martins, mós aseita tanba vítima mate ona, nune’e asegura arguidu iha prizaun hodi hein prosesu investigasaun.
Rekorda fali katak, motivu husi akontesimentu tanba atu troka malu kous nia oan ne’ebé foin fulan-ida.
Arguidu hakarak kous nia-oan, maibé nia fen la fó, nune’e Arguidu ho nia-fen odiu malu to’o, Arguidu foti katana hodi taa nia-fen nia hasan iha kotuk laran parte kanuruk, liman dala ida no ikus mai rezulta arguidu nia-fen mate iha fatin.
Iha prosesu interrogatóriu dahuluk ne’e prezide husi Juiz Turnu José Gonsalves, Ministériu Públiku reprezenta husi Prokuradór Ricardo Leite, arguidu hetan asisténsia legál husi Defensór Públiku, Francisco Martins.
Jornalista: Natalino Costa
Editór: Florencio Miranda Ximenes
