DILI, 08 Juñu 2025 (TATOLI) – Jestór Festivál TasiFest, Luís Simões informa realizasaun eventu TasiFest ho objetivu atu lori Timor-Leste ba mundu.
“Ita konvida artista internasionál hanesan Rui Orlando, Nadia Vega no Anji Manji no jornalista sira husi Indonezia no Malázia hodi mai halo kobertura ba eventu ida-ne’e, tanba objetivu husi eventu ne’e atu promove Timor ba mundu”, Luís Simoes dehan ba Tatoli iha Tasi Tolu, ohin.
Nia hateten, eventu TasiFest realiza di’ak tebes, tanba envolve ema hotu iha atividade ne’e no tuir duni padraun internasionál.
“Atinji duni ita-nia objetivu eventu ne’e atu envolve populasaun lokál, objetivu ida kria estrutura ida foun ho standar internasionál no halo buat ruma úniku, ha’u hanoin ita atinji duni objetivu sira-ne’ebe ita iha”, nia esplika.
Jestór ne’e mós informa katak, orsamentu ne’ebe realiza ba eventu ne’e ho totál rihun $15.
“Tinan ida ne’e ita lakon osan, maibé ida-ne’e ita hatene antes ona no molok halo eventu, tanba ami deside atu halo boot nafatin maske ita lakon osan husi ita-nia osan rasik no tuir planu duni orsamentu ne’ebe ita gastu hamutuk rihun $15,” nia informa.
Nia agradese ba patrosinadór sira-ne’ebé apoia eventu ne’e mai husi Governu Austrália liuhusi MDF, GovernuTimor-Leste liuhusi Ministeriu Komérsiu Turismu, Munisípiu Dili no sosiadade sivíl sira.
Jornalista : Felicidade Ximenes
Editór : Evaristo Soares Martins
