DILI, 03 Jullu 2026 (TATOLI)—Primeiru-Ministru, Kay Rala Xanana Gusmão, rekoñese katak prosesu konstrusaun nasaun Timor-Leste iha dezáfiu boot ne’ebé rai ne’e hasoru daudaun mak dezenvolvimentu rekursu Umanu.
“Tanba ne’e permite timoroan sira atu servisu iha Singapura hodi fó formasaun, abilidade no esperiénsia neʼebé importante bainhira sira fila mai Timor bele fó rendimentu ba timoroan no sira-nia família,” Xefe Governu, Kay Rala Xanana Gusmão, hateten iha Palásiu Governu, ohin.
Iha tinan 2025, nia hatutan, timoroan sira-ne’ebé servisu iha rai-li’ur bele hatama remesas to’o millaun $180 ne’ebé kuaze 10% husi PIB.
Ida-ne’e hatudu katak kontribuisaun importante husi traballadór timoroan sira iha rai-li’ur ba sira-nia família, ba Timor-Leste nia ekonomia nasionál no empregadór ne’e rasik importante tebes.
“Durante ne’e, ami-nia traballadór timoroan sira servisu ona iha Austrália, Korea Súl, Nova Zelándia no Japaun iha programa mobilidade laborál. Governu kontente tebes agora mós servisu hamutuk ho Singapura atu fó oportunidade ba timoroan atu ba buka moris iha Singapura,” Xefe Governu apresia.
Primeiru-Ministru no Ministru Finansa Repúblika Singapura, Lawrence Wong, dehan ohin iha diskusaun sira mós ko’alia kona-ba investimentu rekursu umanu no ekonómika (investór) ne’ebé atu apoia dezenvolvimentu no fó servisu ba timoroan sira.
“Bainhira servisu hamri’ik ami bele kria oportunidade negósiu foun, apoia diversifikasaun kresimentu ekonómia ne’ebé bele fó benefísiu ba nasaun rua,” PM Singapura relata.
Iha tinan oin, nia hateten, Singapura sei loke mós setór no okupasaun balun ba traballadór timoroan iha Singapura. Ida-ne’e sei kria oportunidade foun ba timoroan sira bainhira haforsa ligasaun negósiu husi povu ba povu entire naaun rua ne’e.
Jornalista : Alexandra da Costa
Editór : Cancio Ximenes
