DILI, 08 Juñu 2025 (TATOLI)-Ministériu Turizmu liuhusi Diretór Jerál Turizmu, António da Silva, lansa feira turizmu mãrinu loron ikus semana oseanu nian iha Sentru Konvensaun Dili (CCD) Merkadu Lama.
Feira marítima ida-ne’e ho objetivu atu promove setór produtiva privadu sira-ne’ebé mak prienxe atividade turizmu mãrina nian, no transforma rekursu mãrina sai atividade ekonomia ne’ebé bele fó benefísiu ba sira ho resposabilidade.
“Ita-nia feira ida-ne’e partisipa husi grupu lubuk ida-ne’ebé iha kompromisu ida de’it hodi prezerva tasi ho di’ak liuhusi protesaun ekosistema”, Diretór Jerál Turizmu, António da Silva informa ba jornalista sira iha CCD, Merkadu Lama, Dili, ohin.
Atividade ba selebrasaun loron mundiál nian Governu sei esforsu hodi realiza kada tinan, sei envolve grupu barak liután no prepara mós programa ne’ebé di’ak liután tanba loron mundiál ne’e la’ós akontese de’it iha timor maibé iha mundu tomak.
“Hanesan ita boot sira haree iha tinan ida-ne’e ita lansa ba iha munisipiu sira hotu la’ós de’it iha Dili, enkuantu atividade ne’e mós ita abertura ona iha semana kotuk kuazé atividade lubuk ida mak ita halo ona durante semana ida hanesan limpeza jerál, karavana, loke feira, kompetisaun, no ohin kontinuasaun hodi ensera”, governante ne’e esplika.
Governu mós sei apoiu joven sira-ne’ebé konserva animál (lenuk) tasi no korál sira tuir planu sei vizita sira-nia fatin no mellora di’ak liután sira-nia inistiva ne’e.
Entretantu atividade ne’e hetan partisipasaun husi entidade Governu, estudante universitáriu, grupu kulinária no artesanatu sira hodi prienxe ba feira, nune’e iha biban ida-ne’e mos MSSI no SEKOMS ensera ba atividade selebrasaun loron mundiál oseanu.
Notisia relevante:Feira Oseanu: Xanana apela kuidadu ambiente tasi tanba mundu agora tau atensaun
Jornalista: Alexandra da Costa
Editór: Florencio Miranda Ximenes
